ໜ້າຫຼັກ / ການເຄື່ອນໄຫວ / ເຈົ້າແຂວງຜົ້ງສາລີ ພ້ອມດ້ວຍຂະແໜງການທີ່ກ່ຽວຂ້ອງຂັ້ນແຂວງ ລົງຢ້ຽມຢາມ ໂຮງງານຜະລິດດິນຈີ່ ທັນສະໄໝ ເອັດສເຄຊີ.
ຕອນແລງຂອງວັນທີ 21 ມັງກອນ 2025 ນີ້, ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ ພ້ອມດ້ວຍຄະນະຈາກຂະແໜງການທີ່ກ່ຽວຂ້ອງຂັ້ນແຂວງໄດ້ລົງຢ້ຽມຢາມ ແລະ ຕິດຕາມຊຸກຍູ້ການຈັດຕັ້ງປະຕິບັດວຽກງານຂອງໂຮງງານຜະລິດດິນຈີ່ ທັນສະໄໝ ເອັດສເຄຊີ ເຊິ່ງຕາງໜ້າໂຮງງານໂດຍການຕ້ອນຮັບຂອງທ່ານ ຂັນເພັດ ສຸກສະຫວັນ ພ້ອມດວຍພະນັກງງານວີຊາການຂອງ ໂຮງງານຜະລິດດິນຈີ່ ທັນສະໄໝ ເອັດສເຄຊີ ຢ່າງອົບອຸ່ນ.
ທ່ານ ຂັນເພັດ ສຸກສະຫວັນ ຕາງໜ້າໂຮງງານຜະລິດດິນຈີ່ ທັນສະໄໝ ເອັດສເຄຊີໃຫ້ຮູ້ວ່າ: ໂຮງງານຜະລິດດິນຈີ່ ທັນສະໄໝ ເອັດສ໌ເຄຊີ ຕັ້ງຢູ່ບ້ານພຽງດອກຄຳ, ເມືອງບຸນເໜືອ ເຊິ່ງໄດ້ສ້າງຕັ້ງ ຂຶ້ນໃນຊ່ວງລະດູຝົນ ຂອງເດືອນ ກໍລະກົດ 2024 ທີ່ຜ່ານມາ ເຮັດໃຫ້ພົບອຸປະສັກ ແລະ ສິ່ງທ້າທາຍຫຼາຍຢ່າງ ບໍ່ວ່າຈະເປັນເລື່ອງດິນຟ້າອາກາດທີ່ບໍ່ເອື້ອອໍານວຍ, ການນໍາເຂົ້າອຸປະກອນການກໍ່ສ້າງທີ່ລ່າຊ້າກ່ອນກຳນົດ ເພາະມີອຸທົບກະໄພ ແລະ ດິນເຈື່ອນ ເກີດຂຶ້ນໃນ ເວລາຂົນສົ່ງ, ແຕ່ດ້ວຍຄວາມຮຽກຮ້ອງຕ້ອງການຂອງພາກ ລັດ ແລະ ເອກະຊົນ ໃນການປະກອບສ່ວນເຂົ້າໃນການສ້າງສາພັດທະນາບ້ານເມືອງ ທາງໂຮງງານໄດ້ເອົາໃຈໃສ່ກໍ່ສ້າງ ສໍາເລັດແລ້ວພາຍໃນ 3 ເດືອນ ຄືສໍາເລັດທ້າຍເດືອນ ຕຸລາ 2024 ຕາມແຜນການທີ່ວາງໄວ້ ແລະ ສາມາດອອກວາງຈຳໜ່າຍໃຫ້ແກ່ພໍ່ແມ່ປະຊາຊົນໄດ້ໃນຕົ້ນເດືອນ ທັນວາ 2024. ເຊິ່ງ ຕາມແຜນແມ່ນຈະວາງຈໍາໜ່າຍໃຫ້ພໍ່ແມ່ປະຊາຊົນ ໃນເດືອນ ຕຸລາ 2024 ແຕ່ດ້ວຍຄວາມຮັບຜິດຊອບຕໍ່ ຜະລິດຕະພັນຂອງໂຮງງານ ຈຶ່ງມີ ການທົດລອງຜະລິດຕະພັນໃຫ້ໄດ້ມາດຕະຖານກ່ອນ ແລ້ວຈຶ່ງວາງ ຈໍາໜ່າຍສູ່ທ້ອງຕະຫຼາດ ເຊິ່ງເຮັດໃຫ້ເກີດມີຄວາມລ່າຊ້າໃນການວາງຈໍາໜ່າຍສູ່ທ້ອງຕະຫຼາດອອກໄປ 1 ເດືອນ ເຕັມ. ໂຮງງານ ຜະລິດ ດິນຈີ່ ທັນສະໄໝ ດັ່ງກ່າວ ເປັນໂຮງງານ ທີ່ມີກຳລັງການຜະລິດດິນຈີ່ ທີ່ໃຫ່ຍທີ່ສຸດໃນເທດສະບານແຂວງໃຫ່ມ ທີ່ເມືອງ ບຸນເໜືອ, ແຂວງ ຜົ້ງສາລີ. ເຊິ່ງໂຮງງານ ມີການຜະລິດດິນຈີ່ຢູ່ 2 ປະເພດຄື:ປະເພດດິນຈີ່ ກ້ອນນ້ອຍ ຂະໜາດມາດຕະຖານ 9x5x19 cm ມີກຳລັງການຜະລິດຢູ່ 60,000 ກ້ອນ/ມື້ ເຊິ່ງທາງໂຮງງານຈໍາໜ່າຍໃນລາຄາ 900 ກີບ/ກ້ອນ, ປະເພດດິນຈີ່ ກ້ອນໃຫ່ຍ ມີຂະໜາດມາດຕະຖານ 9x9x19 cm 4 ຮູ້ ລ່ວງນອນ ກໍາລັງການຜະລິດຢູ່ 40,000 ກ້ອນ/ມື້ ເຊິ່ງຈໍາໜ່າຍໃນລາຄາ 1,900 ກີບ/ກ້ອນ. ລວມທັງໝົດແລ້ວ ກໍາລັງການຜະລິດທີ່ສາມາດສະໜອງໃຫ້ຕະຫຼາດແມ່ນມີບໍ່ຕໍ່າກວ່າ 100,000 ກ້ອນ/ມື້, ເຊິ່ງນຳໃຊ້ກົນຈັກທີ່ທັນສະໄໝເຂົ້າໃນການຜະລິດ. ໃນປັດຈຸບັນພາຍໃນໂຮງງານມີແຮງງານພຽງແຕ່ 15 ເຖິງ 17 ຄົນ ໃນນີ້ແຮງງານປະຈຳມີຢູ່ 7 ຄົນ ແລະ ແຮງງານຊົ່ວຄາວມີຢູ່ປະມານ 10 ຄົນ ເຊິ່ງມັນບໍ່ພຽງພໍໃນການນໍາໃຊ້ແຮງງານເຂົ້າໃນການຜະລິດຢ່າງເຕັມ ປະສິດທິພາບ. ໂຮງງານດັ່ງກ່າວ ສາມາດຫຼຸດຜ່ອນການນໍາເຂົ້າດິນຈີ່ຈາກຕ່າງແຂວງ ແລະ ໄດ້ຈຳໜ່າຍສະໜອງພາຍໃນຢ່າງມີປະສິດທິພາບ ເພາະມີຂະໜາດດິນຈີ່ທີ່ໄດ້ມາດຕະຖານ ແລະ ລາຄາສົມເຫດສົມຜົນ ຊ່ວຍຫຼຸດຜ່ອນການໃຊ້ຈ່າຍຂອງພໍ່ແມ່ປະຊາຊົນຊາວແຂວງຜົ້ງສາລີ. ສຳລັບທິດທາງແຜນນການທາງໂຮງງານມີ ແຜນທີ່ຈະວາງຈໍາໜ່າຍພາຍໃນແຂວງ ແລະ ແຂວງອ້ອມຂ້າງ ໃນຈໍານວນບໍ່ຕໍ່າກ່າວ 20,000,000 ກ້ອນ/ປີ (ຊາວລ້ານກ້ອນຕໍ່ປີ).
ໃນໂອກາດນີ້, ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ໄດ້ກ່າວສະແດງຄວາມຍ້ອງຍໍຊົມເຊີຍມາຍັງ ໂຮງງານຜະລິດດິນຈີ່ ທັນສະໄໝ ເອັດສເຄຊີ ທີ່ໄດ້ລົງທຶນເຂົ້າໃນການຜະລິດດີນຈີ່ທີ່ທັນສະໄໝ ເຊິ່ງມັນໄດ້ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງແຂວງ ກໍ່ຄືການແກ້ໄຂຊີວິດການເປັນຢູ່ຂອງປະຊາຊົນດີຂຶ້ນເທື່ອລະກ້າວ, ທັງເປັນການສົ່ງເສີມການຜະລິດ ພາຍໃນ ເຮັດໃຫ້ປະຊາຊົນມີອາຊີບ ສ້າງວຽກເຮັດງານທຳ, ພ້ອມກັນນີ້ ທ່ານເຈົ້າແຂວງໄດ້ຮຽກຮ້ອງໃຫ້ທາງໂຮງງານ ເອົາໃຈໃສ່ໃນການຮັກສາສິ່ງແວດລ້ອມ ທີ່ອາດຈະສົ່ງຜົນກະທົບຕໍ່ປະຊາຊົນໃນເຂດອ້ອມຂ້າງ, ສືບຕໍ່ເກັບກຳຫາງສຽງຂອງຜູ້ຊົມໃຊ້ ເພື່ອປັບປຸງຄຸນນະພາບດີນຈີ່ໃຫ້ດີຂຶ້ນກ່ວາເກົ່າ, ສືບຕໍ່ອົບຮົມແຮງງານໃຫ້ມີຄວາມສຳນິສຳນານໃນການນຳໃຊ້ເຄື່ອງຈັກທີ່ທັນສະໄໝ, ສືບຕໍ່ຊອກຕະຫຼາດໃນການຈຳໜ່າຍ ພາຍໃນແຂວງ, ຕ່າງແຂວງ ໂດຍການໂຄສະນາຜ່ານຊ່ອງທາງອອນລາຍໃຫ້ຫຼາຍຂຶ້ນ.
