ໜ້າຫຼັກ / ການເຄື່ອນໄຫວ / ຫ້ອງການພາຍໃນເມືອງບຸນໃຕ້, ແຂວງຜົ້ງສາລີ ຈັດກອງປະຊຸມສະຫຼຸບວຽກງານຄຸ້ມຄອງພົນລະເມືອງປະຈຳປີ 2024 ແລະ ວາງທິດທາງແຜນການປະຈໍາປີ 2025.
ກອງປະຊຸມສະຫຼຸບວຽກງານຄຸ້ມຄອງພົນລະເມືອງປະຈຳປີ 2024 ແລະ ວາງທິດທາງແຜນການປະຈຳປີ 2025. ຂອງຫ້ອງການພາຍໃນເມືອງ ທີ່ມີຫຼາຍຂະແໜງການຮັບຜິດຊອບຮ່ວມ; ໄດ້ຈັດຂຶ້ນໃນຕອນເຊົ້າຂອງວັນທີ 23 ມັງກອນ 2025 ນີ້ ຢູ່ທີ່ຫ້ອງປະຊຸມຄະນະປະຈໍາຫຼັງເກົ່າ. ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ບຸນຈັນ ເຈີເອີ ຮອງເລຂາພັກເມືອງ, ຜູ້ຊີ້ນຳວຽກງານພັກ-ພະນັກງານ, ເຂົ້າຮ່ວມມີທ່ານ ບຸນສາລີ ແສງດາວົງ ກຳມະການພັກເມືອງ ຫົວໜ້າຫ້ອງການພາຍໃນເມືອງ, ມີບັນດາທ່ານ ກຳມະການພັກເມືອງ, ຫົວໜ້າຫ້ອງການ, ຄະນະປະສານງານ, ກອງເລຂາຊ່ວຍວຽກຈາກ ບັນດາຂະແໜງການທີ່ກ່ຽວຂ້ອງ ເຂົ້າຮ່ວມທັງໝົດ 16 ທ່ານ, ຍິງ 6 ທ່ານ.
ໃນກອງປະຊຸມ ທ່ານ ຄຳພັນ ຈັນປະເສີດ ຮອງຫົວໜ້າຫ້ອງການພາຍໃນເມືອງ ໄດ້ໃຫ້ຮູ້ວ່າ: ກອງປະຊຸມຄັ້ງນີ້ຈັດຂຶ້ນໂດຍແມ່ນຈັດຕັ້ງປະຕິບັດຕາມ ຂໍ້ຕົກລົງຂອງທ່ານນາຍົກລັດຖະມົນຕີ, ສະບັບເລກທີ 71 /ນຍ ລົງວັນທີ 26 ກໍລະກົດ 2013 ວ່າດ້ວຍການແຕ່ງຕັ້ງຄະນະກໍາມະການປະສານງານວຽກງານຄຸ້ມຄອງ ພົນລະເມືອງ ຂັ້ນກະຊວງ, ນະຄອນຫຼວງ - ແຂວງ, ຂັ້ນເມືອງ ໃຫ້ດໍາເນີນຕາມຈຸດປະສົງ ເປົ້າໝາຍ ແລະ ຖືກທິດ ເຊິ່ງກອງປະຊຸມຈະໄດ້ຮັບຟັງບົດສະຫຼຸບວຽກງານຄຸ້ມຄອງພົນລະເມືອງປະຈຳປີ 2024 ເພື່ອເປັນການ ຖອດຖອນບົດຮຽນໃນແຕ່ລະວຽກທີ່ໄດ້ມອບໝາຍໃຫ້ພາກສ່ວນທີ່ກ່ຽວຂ້ອງຈັດຕັ້ງປະຕິບັດໃນໄລຍະຜ່ານມາ ພ້ອມທັງປະກອບຄຳຄິດຄຳເຫັນ ແລະ ວາງທິດທາງແຜນການປະຈຳປີ 2025. ຈາກນັ້ນ, ທ່ານ ບຸນສາລີ ແສງດາວົງ ກຳມະການພັກເມືອງ ຫົວໜ້າຫ້ອງການພາຍໃນເມືອງ, ໄດ້ຜ່ານບົດສະຫຼຸບວຽກງານຄຸ້ມຄອງພົນລະເມືອງປະຈຳປີ 2024 ແລະ ທິດທາງແຜນການປະຈໍາປີ 2025 ເຊິ່ງໃນບົດສະຫຼຸບໄດ້ຍົກໃຫ້ເຫັນສະພາບ ລວມດ້ານໂຄງ ສ້າງພົນລະເມືອງພາຍໃນເມືອງບຸນໃຕ້, ການຈັດຕັ້ງປະຕິບັດການເຄື່ອນໄຫວຄຸ້ມຄອງພົນລະເມືອງ ຂອງແຕ່ລະຂະແໜງການ ເຊິ່ງປະກອບມີ: ຫ້ອງການພາຍໃນເມືອງ, ຫ້ອງການຍຸຕິທຳເມືອງ, ກອງບັນຊາການປ້ອງກັນຄວາມ ສະຫງົບ, ຫ້ອງວ່າການເມືອງ, ຫ້ອງການສາທາລະນະສຸກ, ຫ້ອງ ການສຶກສາທິການ ແລະ ກິລາເມືອງ, ຫ້ອງການແຜນການ ແລະ ການລົງທຶນ ເຊິ່ງໃນແຕ່ລະຄວາມ ຮັບຜິດຊອບແມ່ນໄດ້ຍົກໃຫ້ເຫັນຈຸດດີອັນພົ້ນເດັ່ນ, ຈຸດອ່ອນຂໍ້ຄົງຄ້າງ ແລະ ບົດຮຽນທີ່ຖອດຖອນ ໄດ້ ເພື່ອເປັນບ່ອນອິງໃນການຈັດຕັ້ງປະຕິບັດໃນສະເພາະໜ້າ ແລະ ຍາວນານ.
ໃນຕອນທ້າຍຂອງກອງປະຊຸມ ທ່ານ ບຸນຈັນ ເຈີເອີ ຮອງເລຂາພັກເມືອງ, ຜູ້ຊີ້ນຳວຽກງານ ພັກ-ພະນັກງານຂັ້ນ ເມືອງ ເຊິ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາຜົນງານຂອງ ຄະນະຮັບຜິດຊອບແຕ່ລະຂະແໜງການ ທີ່ມີຜົນສຳເລັດໃນແຕ່ລະດ້ານ ແລະ ສະແດງຄວາມຊົມເຊີຍຕໍ່ການປະກອບຄຳຄິດເຫັນຕໍ່ກອງປະຊຸມຂອງແຕ່ລະພາກ ສ່ວນ ເຊິ່ງທັງໝົດນັ້ນແມ່ນໄດ້ສະແດງໃຫ້ເຫັນເຖິງຄວາມຮັບຜິດຊອບຈາກແຕ່ລະພາກສ່ວນ. ຄະນະດຽວກັນນັ້ນ ທ່ານຍັງໄດ້ເນັ້ນ ໜັກຫຼາຍບັນຫາ ໃຫ້ແຕ່ລະພາກສ່ວນສືບຕໍ່ເອົາໃຈໃສ່ໃນການປະສານສົມທົບຮ່ວມກັນ ເພື່ອເຮັດ ໃຫ້ວຽກງານການຄູ້ມຄອງພົນລະເມືອງຢູ່ເມືອງບຸນໃຕ້ ສໍາເລັດຕາມຈຸດປະສົງ, ເປົ້າໝາຍ ແລະ ຖືກ ຕ້ອງທິດຕາມທິດທາງແຜນການທີ່ວາງໄວ້, ເປັນຕົ້ນແມ່ນວຽກງານການຂຶ້ນທະບຽນສຳມະໂນຄົວ, ການແຈ້ງທະບຽນການເກີດ, ທະບຽນແຈ້ງເກີດ ແລະ ຖານຂໍ້ມູນອື່ນທີ່ກ່ຽວກັບປະຫວັດຂອງພົນລະເມືອງ ໃຫ້ເປັນລະບົບອັນໜຶ່ງອັນດຽວກັນ, ເອົາໃຈໃສ່ໃນການປະສານງານ ແລະ ຄຸ້ມຄອງວຽກງານພົນລະເມືອງຕ່າງປະເທດທີ່ມີອາໄສຢູ່ ສປປລາວ, ເວົ້າລວມ, ເວົ້າສະເພາະແມ່ນຢູ່ເມືອງບຸນໃຕ້ ໃຫ້ມີຄວາມຖືກຕ້ອງຕາມລະບຽບກົດໝາຍ; ແກ້ໄຂບັນດາປະກົດການທີ່ເກີດຂຶ້ນໃນໄລຍະຜ່ານມາໃຫ້ເຂົ້າສູ່ລະບຽບກົດໝາຍ. ເຊິ່ງທັງໝົດເລົ່ານັ້ນແມ່ນມອບໃຫ້ແຕ່ລະຂະແໜງການທີ່ກ່ຽວຂ້ອງນຳໄປຜັນຂະຫຍາຍ ແລະ ຈັດຕັ້ງປະຕິບັດໃຫ້ປະກົດຜົນເປັນຈິງຢ່າງຖືກຕ້ອງ.
