ໜ້າຫຼັກ / ການເຄື່ອນໄຫວ / ປະກາດຮັບຮອງຈຸດສຸມບ້ານໃຫຍ່ສິນໄຊ ເມືອງຂວາ ແຂວງຜົ້ງສາລີ ເປັນຕົວເມືອງນ້ອຍໃນຊົນນະບົດ.
ຕອນແລງຂອງວັນທີ 23 ມັງກອນ 2025 ຢູ່ທີ່ບ້ານ ສິນໄຊ ( ປາກນໍ້ານ້ອຍ ) ເມືອງຂວາ ແຂວງຜົ້ງສາລີ ໄດ້ຈັດໃຫ້ມີພິທີ ປະກາດຮັບຮອງຈຸດສຸມບ້ານໃຫຍ່ສິນໄຊ ເມືອງຂວາ ແຂວງຜົ້ງສາລີ ເປັນຕົວເມືອງນ້ອຍໃນຊົນນະບົດ ເຊິ່ງເປັນຈຸດສຸມທຳອິດຂອງເມືອງ ແລະ ເປັນຈຸດສຸມທີ 2 ຂອງແຂວງ ຂຶ້ນຢ່າງເປັນທາງການ ໂດຍການເຂົ້າຮ່ວມຂອງທ່ານ ອຸ່ຄຳ ຕຸລາພັນ ກຳມະການພັກແຂວງ, ຫົວໜ້າຫ້ອງວ່າການແຂວງ, ສະມາຊີກສະພາແຫ່ງຊາດປະຈຳເຂດເລືອກຕັ້ງແຂວງຜົ້ງສາລີ, ມີທ່ານ ສົມຈິດ ສິດທິວົງ ຫົວໜ້າພະແນກກະສີກຳ ແລະ ປ່າໄມ້ແຂວງ, ມີທ່ານ ສອນສະໜຸກ ສີສຸລາດ ເຈົ້າເມືອງໆຂວາ, ມີຜູ້ຕາງໜ້າຈາກກະຊວງກະສີກຳ ແລະ ປ່າໄມ້, ມີບັນດາທ່ານເຈົ້າເມືອງ, ຮອງເຈົ້າເມືອງທົ່ວແຂວງ, ມີການນໍາຂັ້ນແຂວງ-ຂັ້ນເມືອງ, ເລຂາຄະນະພັກຮາກຖານກຸ່ມບ້ານ, ອົງການປົກຄອງບ້ານ, ບັນດາທ່ານແຂກເຊີນ ແລະ ປະຊາຊົນບັນດາເຜົ່າພາຍໃນບ້ານໃຫຍ່ສິນໄຊເຂົ້າຮ່ວມ.
ໃນພິທີ ທ່ານ ສອນສະໜຸກ ສີສຸລາດ ເຈົ້າເມືອງໆຂວາ ໄດ້ຂຶ້ນຜ່ານບົດລາຍງານ ການສ້າງບ້ານໃຫຍ່ ເປັນຕົວເມືອງນ້ອຍໃນຊົນນະບົດ ເຊິ່ງຈຸດສຸມບ້ານສິນໄຊ ຫ່າງຈາກເທດສະບານເມືອງຂວາ ປະມານ 36 ກິໂລແມັດ, ຈຸດສຸມບ້ານສິນໄຊແມ່ນນອນຢູ່ໃນ 20 ຈຸດສຸມຂອງລັດຖະບານ. ນອນຢູ່ໃນ 15 ຈຸດສຸມຂອງແຂວງ ແລະ ນອນຢູ່ໃນ 9 ກຸ່ມບ້ານຂອງເມືອງຂວາ ປະກອບດ້ວຍ 9 ບ້ານ, ມີ 777 ຄົວເຮືອນ, ມີ 962 ຄອບຄົວ, ມີປະຊາກອນທັງໝົດ 4.683 ຄົນ, ຍິງ 2.198 ຄົນ,ປະກອບດ້ວຍ 8 ເຜົ່າຄື: ເຜົ່າກຶມມຸ, ເຜົ່າອາຄາ, ເຜົ່າລາວ, ເຜົ່າຢັ້ງ, ເຜົ່າໄຕດຳ, ເຜົ່າພູນ້ອຍ, ເຜົ່າລື້ ແລະ ເຜົ່າຫໍ້. ມາຮອດປັດຈຸບັນອີງຕາມດໍາລັດ 348/ນຍ ສາມາດລຶບລ້າງບ້ານທຸກຍາກໄດ້ 02 ບ້ານ, ກວມ 22,2 % ໃນຈໍານວນ 9 ບ້ານທັງໝົດ, ມີຄອບຄົວພົ້ນທຸກ 312 ຄອບຄົວ. ກວມ 21,9 % ຂອງຈໍານວນຄອບຄົວທັງໝົດ, ມີປະຊາກອນພົ້ນທຸກ 1.161 ຄົນກວມ 67,8 %. ກ່ຽວກັບການຈັດຕັ້ງປະຕິບັດຈຸດສຸມບ້ານໃຫ່ຍເປັນຕົວເມືອງໃນຊົນນະບົດຄະນະຜິດຊອບ ແລະ ກອງເລຂາຂັ້ນແຂວງ, ຂັ້ນເມືອງໄດ້ປະເມີນຕາມເງື່ອນໄຂ 16 ມາດຕະຖານສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດທີ່ໄດ້ກໍານົດໃນມາດຕາ 9 ຂອງດໍາລັດ348/ລບ ແລະ ບົດແນະນໍາສະບັບເລກທີ 0830/ກປ, ຜົນການປະເມີນໃນປີ 2024 ສາມາດບັນລຸຄົບ 16 ມາດຖານ, ເຊີ່ງສະແດງອອກຄື: ເປັນບ້ານພັດທະນາຢູ່ຊົນນະບົດ, ເປັນບ້ານທີ່ມີຫົວໜ່ວຍຜະລິດ ແລະ ປຸງແຕ່ງເປັນສີນຄ້າ, ບ້ານເປັນໃຈກາງທາງດ້ານເສດຖະກິດໃຫ້ແກ່ບັນດາບ້ານອ້ອມຂ້າງ, ມີເສັ້ນທາງຄົມມະນາຄົມສະດວກດີ, ມີພື້ນຖານການຜະລິດ ແລະ ປຸງແຕ່ງເປັນສິນຄ້າທີ່ໝັ້ນຄົງ, ມີຕະຫຼາດຖາວອນທີ່ມີການຊື້-ຂາຍເປັນປະຈຳ, ມີສູນບໍລິການໄປສະນີ ຫຼື ໂທລະຄົມມະນາຄົມ, ມີສະຖານີບໍລິການເຕັກນິກກະສິກຳ ແລະ ປ່າໄມ້, ມີໜ່ວຍບໍລິການ ທະນາຄານ ຫຼື ໜ່ວຍບໍລິການ ການເງິນຈຸລະພາກ ໃດໜຶ່ງ, ມີສຸກສາລາ ຫຼື ໂຮງໝໍນ້ອຍ, ມີລະບົບນ້ຳປະປາຊຸມຊົນ, ມີຕະຂ່າຍໄຟຟ້າໃນລະບົບ, ມີໂຮງຮຽນປະຖົມສົມບູນ ແລະ ມັດທະຍົມຕົ້ນ ຫຼື ມັດທະຍົມປາຍ, ມີການຄຸ້ມຄອງ, ປົກປັກຮັກສາ ແລະ ນໍາໃຊ້ຊັບພະຍາກອນທໍາມະຊາດ ແລະ ສິ່ງແວດລ້ອມຢ່າງມີປະສິດທິຜົນ ແລະ ຢືນຍົງ, ມີລາຍໄດ້ສະເລ່ຍ 5,6 ລ້ານກີບ ຫຼື 700 ໂດລາ ຕໍ່ຄົນ ຕໍ່ປີ ຂຶ້ນໄປ, ເປັນບ້ານທີມີພົນລະເມືອງໃນຈໍານວນທີ່ແນ່ນອນ.
ໃນພິທີ ທ່ານ ຄໍາເປື່ອງ ເມືອງໄຊ ຮອງຫົວໜ້າຫ້ອງວ່າການແຂວງ ໄດ້ຜ່ານຂໍ້ຕົກລົງຂອງເຈົ້າແຂວງ ສະບັບເລກທີ 992/ຂຜລ ວ່າດ້ວຍການຮັບຮອງເອົາຈຸດສຸມບ້ານໃຫຍ່ສິນໄຊ ເປັນຕົວເມືອງໃນຊົນນະບົດ ຈາກນັ້ນທ່ານ ອຸ່ຄຳ ຕຸລາພັນ ຫົວໜ້າຫ້ອງວ່າການແຂວງ ໄດ້ມອບຂໍ້ຕົກລົງຂອງເຈົ້າແຂວງ ວ່າດ້ວຍການຮັບຮອງເອົາຈຸດສຸມບ້ານໃຫຍ່ສິນໄຊ ເປັນຕົວເມືອງໃນຊົນນະບົດ ແລະ ຂຶ້ນຮັບໂດຍທ່ານ ບຸນໂຮມ ຈີນດາເພັດ ເລຂາພັກກຸ່ມບ້ານສິນໄຊ ຈາກນັ້ນຄະນະປະທານພິທີ ໄດ້ພ້ອມກັນຕັດແຖບຜ້າ, ພ້ອມທັງເປີດປ້າຍ ແລະ ທ່ານ ອຸ່ຄຳ ຕຸລາພັນ ຫົວໜ້າຫ້ອງວ່າການແຂວງ ລັ້ນຄ້ອງ 9 ບາດ ເພື່ອປະກາດ ຈຸດສຸມບ້ານໃຫຍ່ສິນໄຊ ເມືອງຂວາ ເປັນຕົວເມືອງໃນຊົນນະບົດ ຢ່າງເປັນທາງການ.
ໂອກາດທີ່ມີຄວາມໝາຍຄວາມສຳຄັນນີ້, ທ່ານ ອຸ່ຄໍາ ຕຸລາພັນ ຫົວໜ້າຫ້ອງວ່າການແຂວງ ໄດ້ມີຄໍາເຫັນຮຽກຮ້ອງ ໃຫ້ຄະນະພັກ, ອົງການປົກຄອງແຕ່ລະຂັ້ນ ຖືສໍາຄັນເປັນບູລິມະສິດ ແລະ ສືບຕໍ່ສຸມໃສ່ກໍ່ສ້າງຕົວເມືອງນ້ອຍໃນຊົນນະບົດ ໂດຍສຸມໃສ່ 5 ຈຸດຮອດປີ 2025 ທີ່ຍັງບໍ່ບັນລຸ, ໃຫ້ບັນລຸເພີ່ມຂຶ້ນຕື່ມ, ສືບຕໍ່ຊ່ວຍກັນປຸກລະດົມ ແລະ ຍາດແຍ່ງທຸກແຫຼ່ງທຶນຈາກພາຍໃນ ແລະ ພາຍນອກ, ຈາກທຸກພາກສ່ວນໃນສັງຄົມ ມາສຸມໃສ່ຈັດຕັ້ງປະຕິບັດແຜນການ, ໂຄງການ ຂອງຕົວເມືອງນ້ອຍທີ່ໄດ້ຈັດຕັ້ງປະຕິບັດ, ສືບຕໍ່ສຸມໃສ່ແກ້ໄຂຄວາມທຸກຍາກ ໃນ 128 ບ້ານ, 7040 ຄອບຄົວ ແລະ ສ້າງເມືອງພົ້ນທຸກໃຫ້ໄດ້ຕື່ມ, ໃຫ້ສືບຕໍ່ເອົາໃຈໃສ່ລົງໃກ້ສີດ, ຕິດແທດ ແລະ ຊີ້ນໍາ-ນໍາພາການຈັດຕັ້ງປະຕິບັດວຽກງານຮອບດ້ານຂອງກຸ່ມບ້ານ, ຄະນະພັກ, ອົງການປົກຄອງບ້ານ ແລະ ປະຊາຊົນໃຫ້ເປັນປົກກະຕິ, ສືບຕໍ່ຄຸ້ມຄອງ, ພັດທະນາຕົວເມືອງນ້ອຍຢູ່ຈຸດນີ້ ແລະ ຈຸດອື່ນ ໃຫ້ໄປຕາມແຜນຜັງ, ເຕັກນິກ, ເປັນລະບຽບຮຽບຮ້ອຍ, ຈົບງາມ ແລະ ມີຄວາມປອດໄພ, ເປັນໜ້າຢູ່ ແລະ ໜ້າທ່ອງທ່ຽວ ໂດຍປະຕິບັດຕາມຫຼັກການທີ່ວ່າ: ລັດ ກັບ ປະຊາຊົນ ພ້ອມກັນຈັດຕັ້ງປະຕິບັດ, ລັດກັບປະຊາຊົນ ກັບທຸລະກິດ, ກັບທະນາຄານ ພ້ອມກັນເຮັດ. ໃຫ້ຄະນະພັກຮາກຖານກຸ່ມ, ອົງການປົກຄອງບ້ານ ແລະ ປະຊາຊົນບັນດາເຜົ່າ ເອົາໃຈໃສ່ເຂົ້າຮ່ວມແນວທາງປ້ອງກັນຊາດ-ປ້ອງກັນຄວາມສະຫງົບ ຕ້ານ ແລະ ພ້ອມກັນສະກັດກັ້ນປະກົດການຫຍໍ້ທໍ້ດ້ານຕ່າງໆ ທີ່ເກີດຂຶ້ນພາຍໃນບ້ານ, ແນ່ໃສ່ເຮັດໃຫ້ພາຍໃນບ້ານມີຄວາມສະຫງົບປອດໄພ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການປັບປຸງແກ້ໄຂໃຫ້ດີຂຶ້ນເທື່ອລະກ້າວ.
