ໜ້າຫຼັກ / ການເຄື່ອນໄຫວ / ກອງປະຊຸມ ທາບທາມບຸກຄະລາກອນທີ່ຈະອອກຮັບສະໜັກເລືອກຕັ້ງເອົາຄະນະບໍລິຫານງານພັກເມືອງ ໃໝ່ແຂວງຜົ້ງສາລີ ສະໄໝທີ່ XV ຮອບທີ່ II
ໃນຕອນເຊົ້າຂອງວັນທີ 27 ມັງກອນ 2025 ຢູ່ທີ່ສະໂມສອນໃຫຍ່ຂອງ ເມືອງໃໝ່ ແຂວງຜົ້ງສາລີ ໄດ້ເປີດກອງປະຊຸມທາບທາມບຸກຄະລະກອນທີ່ອອກຮັບສະໜັກເລືອກຕັ້ງເອົາຄະນະບໍລີງານພັກເມືອງໃໝ່ ສະໄໝທີ XV ຮອບທີ່ II ໂດຍການໃຫ້ກຽດເຂົ້າຮ່ວມຂອງ ສະຫາຍ ບຸນທະວີ ສໍສຸກັນ ກຳມະການປະຈໍາພັກແຂວງ ປະທານກວດກາພັກ-ລັດແຂວງ ຮອງຫົວໜ້າອະນຸກໍາມະການບຸກຄະລະກອນຂັ້ນແຂວງຜົ້ງສາລີ, ມີສະຫາຍ ພອນພະວີ ໄຊມົນຕີ ກໍາມະການພັກແຂວງ ເລຂາຄະນະບໍລິຫານພັກເມືອງ ເຈົ້າເມືອງໆໃໝ່ ມີບັນດາສະຫາຍຄະນະປະຈຳພັກເມືອງ ກຳມະການພັກເມືອງ ເລຂາໝ່ວຍພັກ ເລຂາຄະນະພັກຮາກຖານກຸ່ມ, ເລຂາໝ່ວຍພັກບ້ານທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງໃໝ່ ແລະ ອະນຸກຳມະການບຸກຄະລະກອນຂັ້ນແຂວງເຂົ້າຮ່ວມ
ໃນກອງປະຊຸມ ສະຫາຍ ບຸນທະວີ ສໍສຸກັນ ກຳມະການປະຈໍາພັກແຂວງ ປະທານກວດກາພັກ-ລັດແຂວງ ຮອງຫົວໜ້າອະນຸກໍາມະການບຸກຄະລະກອນຂັ້ນແຂວງຜົ້ງສາລີ ໄດ້ຂື້ນກ່າວເປີດກອງປະຊຸມຢ່າງເປັນທາງການ ພ້ອມທັງຊີ້ນຳກອງປະຊຸມໃນຄັ້ງນີ້ ເຊິ່ງສະຫາຍໄດ້ມີຄຳເຫັນວ່າ: ກອງປະຊຸມຄັ້ງນີ້ ຈະໄດ້ຄັດເລືອກເອົາບຸກຄະລາກອນ ຜູ້ທີ່ມີມາດຖານເງື່ອນໄຂ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ ຄວາມສາມາດ, ມີແບບແຜນນໍາພາ-ວິທີເຮັດວຽກທີ່ດີ ແລະ ມີແບບແຜນດໍາລົງຊີວິດ ທີ່ປອດໃສບໍລິສຸດ, ສະນັ້ນ, ຈຶ່ງຮຽກຮ້ອງມາຍັງຜູ້ແທນທີ່ເຂົ້າຮ່ວມກອງປະຊູູູມທຸກໆສະຫາຍ ຈົ່ງຍົກສູງຄວາມຮັບຜິດຊອບ, ຄົ້ນຄ້ວາພິຈາລະນາ ຢ່າງຖີ່ຖ້ວນ, ພາວະວິໄສ ເພື່ອເລືອກເອົາຜູ້ທີ່ມີມາດຖານເງື່ອນໄຂ ແລະ ໂດດເດັ່ນ ເຂົ້າໃນເປົ້າໝາຍເປັນພະນັກງານນໍາພາ-ຄຸ້ມຄອງ ເພື່ອນໍາພາ-ຊີ້ນໍາວຽກງານອົງການປົກຄອງເມືອງໃໝ່ ໃຫ້ມີການພັດທະນາດີຂຶ້ນກ່ວາເກົ່າ.
ກອງປະຊຸມຄັ້ງນີ້ ມີຜູ້ແທນທີ່ເຂົ້າຮ່ວມກອງປະຊຸມ ໄດ້ພ້ອມກັນດຳເນີນການທາບທາມບຸກຄະລາກອນຜູ້ທີ່ຈະອອກສະໝັກເລືອກຕັ້ງຄະນະບໍລິຫານງານພັກເມືອງສະໄໝທີ່ XV ຮອບທີ່ II ແລະ ທາບທາມເອົາເລຂາ, ຮອງເລຂາຄະນະບໍລິຫານງານພັກເມືອງ ຄະນະປະຈຳພັກເມືອງ, ປະທານ, ຮອງປະທານກວດກາພັກ ໄປຕາມຂັ້ນຕອນຢ່າງຖືກຕ້ອງ.
