ໜ້າຫຼັກ / ການເຄື່ອນໄຫວ / ກອງປະຊຸມ ທາບທາມບຸກຄະລາກອນທີ່ຈະອອກຮັບສະໜັກເລືອກຕັ້ງເອົາຄະນະບໍລິຫານງານພັກເມືອງ ຍອດອູ ແຂວງຜົ້ງສາລີ ສະໄໝທີ່ X ຮອບທີ່ II
ໃນຕອນເຊົ້າຂອງວັນທີ 25 ມັງກອນ 2025 ຢູ່ທີ່ສະໂມສອນໃຫຍ່ຂອງເມືອງ ຍອດອູ ແຂວງຜົ້ງສາລີ ໄດ້ເປີດກອງປະຊຸມທາບທາມບຸກຄະລະກອນທີ່ອອກຮັບສະໜັກເລືອກຕັ້ງເອົາຄະນະບໍລີງານພັກເມືອງຍອດອູ ສະໄໝທີ X ຮອບທີ່ ll ໂດຍການໃຫ້ກຽດເຂົ້າຮ່ວມຂອງສະຫາຍ ສັນຕິ ແກ້ວຍະສານ ກໍາມະການປະຈໍາພັກແຂວງ ຫົວໜ້າຄະນະຈັດຕັ້ງແຂວງ ຮອງຫົວໜ້າຄະນະປັບປຸງກົງຈັກຂັ້ນແຂວງ. ມີ ສະຫາຍ ສົມຫວັງ ສຸມວິໄລ ກຳມະການພັກແຂວງ, ເລຂາຄະນະບໍລິຫານພັກເມືອງເຈົ້າເມືອງໆຍອດອູ ມີບັນດາສະຫາຍຄະນະປະຈຳພັກເມືອງ ກຳມະການພັກເມືອງ ເລຂາໝ່ວຍພັກ ເລຂາຄະນະພັກຮາກຖານກຸ່ມ, ເລຂາໝ່ວຍພັກບ້ານທີ່ເປັນຕົວແທນໃຫ້ແກ່ສະມາຊິກພັກທົ່ວເມືອງຍອດອູ ແລະ ອະນຸກຳມະການບຸກຄະລະກອນຂັ້ນແຂວງເຂົ້າຮ່ວມ
ໃນກອງປະຊຸມສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງໄດ້ມີຄຳເຫັນວ່າ: ກອງປະຊຸມຄັ້ງນີ້ ຈະໄດ້ຄັດເລືອກເອົາບຸກຄະລາກອນ ຜູ້ທີ່ມີມາດຖານເງື່ອນໄຂ, ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຄວາມຮູ້ ຄວາມສາມາດ, ມີແບບແຜນນໍາພາ-ວິທີເຮັດວຽກທີ່ດີ ແລະ ມີແບບແຜນດໍາລົງຊີວິດ ທີ່ປອດໃສບໍລິສຸດ, ສະນັ້ນ, ຈຶ່ງຮຽກຮ້ອງມາຍັງຜູ້ແທນທີ່ເຂົ້າຮ່ວມທຸກໆສະຫາຍ ຈົ່ງຍົກສູງຄວາມຮັບຜິດຊອບ, ຄົ້ນຄ້ວາພິຈາລະນາ ຢ່າງຖີ່ຖ້ວນ, ພາວະວິໄສ ເພື່ອເລືອກເຟັ້ນເອົາຜູ້ທີ່ໄດ້ມາດຖານເງື່ອນໄຂ ແລະ ໂດດເດັ່ນ ເຂົ້າໃນເປົ້າໝາຍເປັນພະນັກງານນໍາພາ-ຄຸ້ມຄອງ ເພື່ອນໍາພາ-ຊີ້ນໍາວຽກງານອົງການປົກຄອງເມືອງຍອດອູ ໃຫ້ມີການພັດທະນາດີຂຶ້ນກ່ວາເກົ່າ.
ກອງປະຊຸມຄັ້ງນີ້ ຜູ້ແທນທີ່ເຂົ້າຮ່ວມກອງປະຊຸມໄດ້ຮັບຟັງຮ່າງລາຍງານຂອງແຕ່ລະອະນຸກໍາມະການເປັນຕົ້ນແມ່ນຮ່າງລາຍງານການເມືອງສອງພາກ ຮ່າງລາຍງານແຜນພັດທະນາເສດຖະກິດ-ສັງຄົມ ຮ່າງລາຍງານບົດສຳຫຼວດການນຳພາລວມຂອງຄະນະບໍລິຫານງານພັກເມືອງ ເພື່ອດຳເນີນກອງປະຊຸມໃຫຍ່ຂອງອົງຄະນະພັກເມືອງຍອດອູສະໄໝທີ X ຈາກນັ້ນ ຜູ້ແທນກອງປະຊຸມໄດ້ຄົ້ນຄ້ວາປະກອບຄຳຄິດຄຳເຫັນໃສ່ຮ່າງລາຍງານແຕ່ລະອະນຸກຳມະການຢ່າງມີຄວາມຮັບຜິດຊອບສູງເພື່ອເຮັດໃຫ້ຮ່າງລາຍງານການເມືອງດັ່ງກ່າວມີເນື້ອໃນຄົບຖ້ວນ, ສົມບູນຂື້ນຕື່ມ ແລະ ດຳເນີນການທາບທາມບຸກຄະລາກອນຜູ້ທີ່ຈະອອກສະໝັກເລືອກຕັ້ງຄະນະບໍລິຫານງານພັກເມືອງ ຮອບທີ່ II ແລະ ທາບທາມເອົາເລຂາ, ຮອງເລຂາຄະນະບໍລິຫານພັກເມືອງ ຄະນະປະຈຳພັກເມືອງ, ປະທານ, ຮອງປະທານກວດກາພັກ ໄປຕາມຂັ້ນຕອນຢ່າງຖືກຕ້ອງ
