ໜ້າຫຼັກ / ການເຄື່ອນໄຫວ / ກອງບັນຊາການ ທະຫານເມືອງສຳພັນແຂວງ ຜົ້ງສາລີ ສະຫຼຸບວຽກງານຮອບດ້ານປະຈຳປີ 2024 ແລະ ວາງທິດທາງແຜນການປະຈຳປີ 2025.
ໃນຕອນບ່າຍຂອງວັນທີ 27 ມັງກອນ 2025 ນີ້ ກອງບັນຊາການ ທະຫານເມືອງສຳພັນແຂວງ ຜົ້ງສາລີ ສະຫຼຸບວຽກງານຮອບດ້ານປະຈຳປີ 2024 ແລະ ວາງທິດທາງແຜນການປະຈຳປີ 2025 ຂື້ນທີ່ຫ້ອງປະຊູມຂອງກອງບັນຊາການທະຫານເມືອງ. ໂດຍການເຂົ້າຮ່ວມເປັນປະທານຂອງສະຫາຍ ທອງຕື ເກຍສະບົງ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງສຳພັນ,ປະທານປ້ອງກັນຊາດ-ປ້ອງກັນຄວາມສະງົບເມືອງ,ມີສະຫາຍ ພັຕ ສົມເພັດ ຄູນປະເສີດ ຫົວໜ້າການເມືອງ ກອງບັນຊາການທະຫານເມືອງສຳພັນ,ມີຄະນະພັກ-ຄະນະບັນຊາ,ຕະຫຼອດຮອດພະນັກ ງານ-ນັກຮົບພາຍໃນກົມກອງ ເຂົ້າຮ່ວມ.
ໃນກອງປະຊຸມ ສະຫາຍ ຮ້ອຍເອກ ນາງເງີນ ພັນທະລີ ຮອງຫົວໜ້າຫ້ອງການບໍລິຫານສັງລວມ ຂື້ນຜ່ານບົດສະ ຫຼຸບຕີລາຄາຄືນຜ່ານການຈັດຕັ້ງປະຕິບັດໜ້າທີ່ວຽກງານຮອບດ້ານໃນໄລຍະ 1 ປີຜ່ານມາ ເຫັນໄດ້ຜົນງານຫຼາຍດ້ານ,ເຊິ່ງຜ່ານມາຄະນະພັກ-ຄະນະບັນຊາໄດ້ພ້ອມກັນສຸມໃສ່ຈັດຕັ້ງປະຕິບັດ 4 ໜ້າທີ່ໃຫ່ຍ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ,ໃນນັ້ນໄດ້ຖືເອົາວຽກງານການເມືອງນຳພາແນວຄິດເປັນວຽກທີ່ສຳຄັນໃນການ ຈັດຕັ້ງປະຕິບັດໜ້າທີ່ວຽກງານ,ເພື່ອໃຫ້ພະນັກງານ-ນັກຮົບມີແນວຄິດອຸ່ນອ່ຽນທຸ່ນທ່ຽງເຊື້ອໝັ້ນຕໍ່ການນຳພາຂອງພັກ ແລະ ໜ້າທີ່ຂອງກົມກອງໄດ້ເປັນຢ່າງດີ,ພ້ອມກັນນັ້ນກົມກອງຍັງໄດ້ປະຕິບັດຄຳສັ່ງກຽມພ້ອມສູ້ຮົບໃນແຕ່ລະພາວະຂອງກອງບັນຊາການທະຫານເມືອງສຳພັນ, ກໍ່ຄືທິດຊີ້ນຳກອງບັນຊາການທະຫານແຂວງຜົ້ງສາລີ,ໃນການເຮັດໜ້າທີ່ເຄື່ອນໄຫວປ້ອງກັນວັນສຳຄັນຂອງຊາດຂອງພັກສາມາດຮັບປະກັນໄດ້ຄວາມສະຫງົບປອດໄພ 100% ອັນພົ້ນເດັ່ນກົມກອງສາມາດສະກັດກັ້ນບັນດາປະກົດການຫຍໍ້ທໍ້ຕ່າງໆ ເປັນຕົ້ນ, ພວກຄົນບໍ່ດີ ໄດ້ເຄື່ອນໄຫວໂຄສະນາຊວນເຊື່ອ, ຫຼິ້ນກິນ ຟຸມເຟື້ອຍຕາມຫາງຮ້ານຕ່າງໆ, ເກີດມີການອາລະວາດຕີກັນ, ທ່ຽວເດິກດິນ,ແລ່ນລົດໄວເກີດອຸປະຕິເຫດຕາມທ່ອງຖະໜົນ, ລັກລອບເຄື່ອນໄຫວຜິດຕໍ່ລະບຽບກົດໝາຍ, ລ່າເນື້ອ,ຈຸດປາ,ຂີ້ລັກງັດ ແງະ, ຄ້າຂາຍເຖື່ອນ, ເຊັ່ນ: ຢາບ້າ, ຢາຝິ່ນ, ຫຼິ້ນພະນັນ,ເກີດອຸປະຕິເຫດເດັກນ້ອຍຕົກນໍ້າ ເສຍຊີວິດ 02 ລາຍ.ເກີດຄະດີຄາດຕະກຳ ເສຍຊີວິດ 4 ລາຍບາດເຈັບສາຫັດ 1 ລາຍ ແລະ ອື່ນໆ,ສ່ວນວຽກງານພະລິດແກ້ໄຂຊິວິດການເປັນຢູ່ ແລະ ຊອກແຫຼ່ງລາຍຮັບເຂົ້າກົມກອງຄະນະພັກ-ຄະນະບັນຊາຍັງໄດ້ຊຸກຍູ້ພະນັກງານ-ນັກຮົບປະຕິບັດວຽກງານ 4 ປູກ 4 ລ້ຽງ, ປັດຈຸບັນກົມກອງ ມີນາ 01 ບ່ອນ ມີເນື້ອທີ 1 ແຮັກຕາເກັບກູ້ຜົນຜະລິດໄດ້ທັງໝົດ 1,841 ກິໂລກຼາມ, ຄິດ ໄລ່ເປັນເງິນ 14,718,000 ກີບ, ມີສ່ວນຢາງພາລາ 01 ບ່ອນມີເນື້ອທີ 1 ແຣັກຕາ ປູກແລ້ວ 741 ຕົ້ນ. ພັດປ່ຽນກັນໄປປະຈຳຢູ່ຈຸດລ້ຽງງົວ 24 ຄັ້ງ ມີ 72 ແຮງງານ; ມີງົວທັງໝົດ 16 ໂຕ ແລະ ແບ້ 6 ໂຕ;ເຊິ່ງໃນທິດທາງແຜນ ການ ເຄື່ອນໄຫວໃນປີ 2025 ນີ້ ຄະນະພັກ-ຄະນະບັນຊາການທະຫານເມືອງສຳພັນ ຈະພ້ອມກັນສຸມໃສ່ເຮັດໃຫ້ວຽກງານຕ່າງໆໄດ້ຮັບໝາກຜົນດີຂື້ນກວ່າເກົ່າ.
ຕອນທ້າຍ ກອງປະຊຸມຍັງໄດ້ຮັບຟັງການໂອ້ລົມຂອງສະຫາຍ ທອງຕື ເກຍສະບົງ ກຳມະການພັກແຂວງ ເລຂາພັກເມືອງ ເຈົ້າເມືອງ-ເມືອງສຳພັນ,ປະທານປ້ອງກັນຊາດ-ປ້ອງກັນຄວາມສະງົບເມືອງ ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ຜົນງານທີ່ກົມກອງຍາດມາໄດ້ໃນປີຜ່ານມາ ພ້ອມທັງເນັ້ນໜັກໃຫ້ພະນັກງານ- ນັກຮົບ ຈົ່ງພ້ອມກັນຈັດຕັ້ງປະຕິ ບັດວຽກງານ ທີ່ຂັ້ນເທິງມອບໝາຍໃຫ້ມີປະສິດທິຜົນສູງຂື້ນ ພ້ອມກັນສືບຕໍ່ຮັກສາມູນເຊື້ອດັ່ງກ່າວໃຫ້ຢືນຍົງຕະຫຼອດໄປ .ແລະ ຮຽກຮອງໃຫ້ເອົາໃຈໃສ່ເຄື່ອນໄຫວ ເກັບກຳສະພາບ,ເຄື່ອນໄຫວລາດຕະເວນຢູ່ເຂດຫ່າງໄກສອກຫຼິກ ຈຸດຫຼໍ່ເຫຼັມເພື່ອປ້ອງກັນ ແລະ ສະກັດກັ້ນບັນຫາຕ່າງໆ ຈະເກີດຂຶ້ນ, ລວມທັງປະກົດການຫຍໍ້ທໍ້ບັນຫາຕ່າງໆ ໃນສັງຄົມເປັນຕົ້ນແມ່ນການຄ້າຂາຍເຖື່ອນ ສິ່ງເສບຕິດເຮັດໃຫ້ພາຍໃນເມືອງບໍ່ມີຄວາມສະຫງົບ.
