ໜ້າຫຼັກ / ການເຄື່ອນໄຫວ / ແຂວງຜົ້ງສາລີ ສະຫຼູບວຽກງານ ແຜນການ ແລະ ການລົງທຶນ ປະຈຳປີ 2024 ແລະ ວາງທິດທາງ ແຜນການ 2025.
ກອງປະຊຸມສະຫຼູບວຽກງານ ແຜນການ ແລະ ການລົງທຶນ ປະຈຳປີ 2024 ແລະ ທິດທາງ ແຜນການ 2025 ຂອງແຂວງຜົ້ງສາລີ ໄດ້ຈັດຂຶ້ນ ໃນຕອນເຊົ້າຂອງວັນທີ 28 ມັງກອນ 2025 ນີ້, ທີ່ຫ້ອງປະຊຸມຂອງພະແນກການເງິນແຂວງ ໂດຍພາຍໃຕ້ການເປັນປະທານຂອງທ່ານ ທອງສຸກ ເປົາສຸລີ ຫົວໜ້າພະແນກແຜນການ ແລະ ການລົງທຶນແຂວງ, ເປັນກຽດເຂົ້າຮ່ວມຂອງທ່ານ ວີສອນ ລາວເມົາ ຮອງເຈົ້າແຂວງຜົ້ງສາລີ, ຜູ້ຊີ້ນຳຂົງເຂດເສດຖະກິດຂັ້ນແຂວງ, ມີບັນດາທ່ານຫົວໜ້າ-ຮອງຫົວໜ້າພະແນກການ, ອົງການທຽບເທົ່າ ອ້ອມຂ້າງແຂວງ, ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າຫ້ອງການແຜນການ ແລະ ການລົງທຶນ 7 ເມືອງທົ່ວແຂວງພ້ອມດ້ວຍແຂກເຊີນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມທ່ານ ທອງສຸກ ເປົາສຸລີ ຫົວໜ້າພະແນກແຜນການ ແລະ ການລົງທຶນແຂວງ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງຜ່ານຮ່າງບົດລາຍງານການຈັດຕັ້ງປະຕິບັດວຽກງານ ແຜນການ ແລະ ການລົງທຶນປະຈໍາປີ 2024 ແລະ ແຜນການປະຈໍາປີ 2025 ເຊິ່ງທ່ານ ໄດ້ຍົກໃຫ້ເຫັນດ້ານດີຜົນສຳເລັດ, ດ້ານອ່ອນຂໍ້ຄົງຄ້າງ ບາງບົດຮຽນທີ່ຖອດຖອນໄດ້ໃນການຈັດຕັ້ງປະຕິບັດ ເຊິ່ງໃນ 1 ປີຜ່ານມາ ຂະແໜງແຜນການ ໄດ້ປະສານສົມທົບກັບພະແນກການຂັ້ນແຂວງ ແລະ ຫ້ອງການແຜນການ ແລະ ການລົງທຶນເມືອງ ໄດ້ຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2026-2030) ແລະ ສະຫຼຸບຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົປະຈໍາປີ 2024 ຊຶ່ງຜົນການຕີລາຄາ ດ້ານເສດຖະກິດມະຫາພາກໃນປີ 2024; ລວມຍອດມູນຄ່າຜະລິດຕະພັນພາຍໃນ, ປະຕິບັດໄດ້ 6,714.20 ຕື້ກີບ, ລື່ນແຜນ 33% (ມະຕິສະພາ 5.077,47ຕື້ກີບ) ເສດຖະກິດຂະຫຍາຍໃນລະດັບ 6,04%; ລື່ນແຜນ 12.81% ( ແຜນການ 5.35%) ລາຍຮັບສະເລັ່ຍຕໍ່ຫົວຄົນ 33.45 ລ້ານກີບປີ 2024 ລະດົມແຫຼ່ງທຶນຕ່າງໆ ເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ປະຕິບັດໄດ້ 1,317.05 ຕື້ກີບ, ລື່ນແຜນການ 21.21%, (ມະຕິສະພາ 1.086,58 ຕື້ກີບ) ເຂົ້າໃນ 354 ໂຄງການໃນນີ້: ການລົງທຶນຂອງລັດປີ 2024 ລັດຖະບານອະນຸມັດມີ 157,26 ຕື້ກີບ, ຈັດສັນໃນ 271 ໂຄງການ ໃນນີ້: ທຶນປົກກະຕີ 210 ໂຄງການ, ມູນຄ່າ 44,66 ຕື້ກີບ; ທຶນບ້ວງຄວາມທຸກຍາກ, ບ້ວງພູມສໍາເນົາ, ບ້ວງພັດທະນາຕົວເມືອງ ແລະ ບ້ວງອື່ນໆ ລວມ 43 ໂຄງການ, ມູນຄ່າ 23,49 ຕື້ກີບ ແລະ ລາຍຮັບເກີນແຜນປີ 2023 ມາຈັດຕັ້ງປະຕິບັດໃນປີ 2024 ຈໍານວນ 18 ໂຄງການ, ມູນຄ່າ 14,37 ຕື້ກີບ; ທຶນປ່ອຍສິນເຊື່ອຂອງທະນາຄານ 325.50 ຕຶ້ກີບ, ວຽກງານປະເມີນຜົນ ໄດ້ຄົ້ນຄ້ວາ, ຄຸ້ມຄອງ ປະເມີນຜົນໂຄງການ ປີ 2024, ໄດ້ຮັບໂຄງການ ເພື່ອປະເມີນຜົນ ມີທັງໝົດ 87 ໂຄງການ, ໃນນັ້ນ; ປະເມີນມີຄວາມສອດຄ່ອງ ຕາມເປົ້າໝາຍ ແລະ ກົດໝາຍລວມມີ 62 ໂຄງການ, ແຈ້ງຜົນການປະເມີນໃຫ້ເຈົ້າຂອງໂຄງການຮັບຊາບ ເພື່ອຊອກແຫຼ່ງທຶນມາຈັດຕັ້ງປະຕິບັດ, ວຽກງານສົ່ງເສີມການລົງທຶນ: ໄດ້ລະດົມແຫຼ່ງທຶນຈາກບັນດາຫົວໜ່ວຍທຸລະກິດຜູ້ປະກອບການພາຍໃນ ແລະ ຕ່າງປະເທດ ຕາມການໃຫ້ນະໂຍບາຍຕາມກົດໝາຍສົ່ງເສີມການລົງທຶນ ຊຶ່ງໃນ 1 ປີໄດ້ຄົ້ນອະນຸມັດການລົງທຶນລວມມີ 15 ໂຄງການ, ມູນຄ່າລົງທຶນ 76,65 ລ້ານໂດລາສະຫະລັດ, ທຶນຈົດທະບຽນ 17,04 ລ້ານໂດລາ, ຂັ້ນສູນກາງອະນຸມັດມີ 6 ໂຄງການ, ແຂວງອະນຸມັດ ມີ 9 ໂຄງການ; ຈັດພິທີເຊັນສັນຍາໄດ້ 5 ສະບັບ ແລະ ເຊັນບົດບັນທຶກ MOU ຈຳນວນ 3 ສະບັບ. ວຽກງານຮ່ວມມືສາກົນ: ໄດ້ຍາດແຍ່ງການຊ່ວຍເຫຼືອເພື່ອການພັດທະນາ (ODA) ໃນ 1 ປີ ຍາດແຍ່ງການຊ່ວຍ ເຫຼືອ ແລະ ກູ້ຢືມມີ 33 ໂຄງການ ລວມມູນຄ່າ 83.33 ຕຶ້ກີບ, ໃນນີ້; ຊ່ວຍເຫຼືອຫລ້າອົງການຈັດຕັ້ງສາກົນ 36.13 ຕື້ກີບກີບ, ທຶນຊ່ວຍເຫຼືອຫລ້າ ຈາກ ສສ ຫວຽດນາມມີ 0.48 ຕື້ກີບ ແລະ ຈາກ ສປ ຈີນ ມີ 31.75 ຕື້ກີບ. ວຽກງານສະຖິຕິ ໄດ້ສະຫຼຸບສັງລວມແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX (2021-2025), ເກັບກໍາລາຄາສິນຄ້າໃນທ້ອງຕະຫຼາດ ເພື່ອຄິດໄລ່ດັດສະນີລາຄາຜູ້ບໍລິໂພກ ແລະ ອັດຕາເງິນເຝີ້ຂອງແຂວງ, ກະກຽມດ້ານຕ່າງໆໃຫ້ແກ່ການສໍາຫຼວດພົນລະເມືອງທີ່ຢູ່ອາໄສທົ່ວປະເທດ ຄັ້ງທີ V. ຈາກນັ້ນ ທ່ານ ທັນວາ ມາໄລສິນ ຮອງຫົວໜ້າພະແນກແຜນການ ແລະ ການລົງທຶນແຂວງ ໄດ້ເຜີຍແຜ່ຄຳສັ່ງແນະນຳ ວ່າດ້ວຍການຈັດຕັ້ງປະຕິບັດແຜນພັດທະນາ-ເສດຖະກິດສັງຄົມ ແຜນການລົງທຶນຂອງລັດປະຈຳປີ 2025.
ໃນກອງປະຊຸມຜູ້ແທນທີ່ເຂົ້າຮ່ວມໄດ້ພ້ອມກັນຄົ້ນຄ້ວາປະກອບຄຳຄິດຄຳເຫັນໃສ່ວຽກງານ ວຽກງານແຜນການ, ວຽກງານການລົງທຶນ, ວຽກງານສະຖິຕິ ແລະ ວຽກງານອື່ນໆ ອີກຈຳນວນໜຶ່ງທີ່ເຫັນວ່າ ການຈັດຕັ້ງປະຕິບັດໃນໄລຍະທີ່ຜ່ານມາຍັງມີຂໍ້ຫຍຸງຍາກ ແລະ ບໍ່ບັນລຸ ທັງນີ້ກໍ່ເພື່ອເປັນເອກະພາບ ແລະ ເປັນບ່ອນອີງ ເພື່ອເຮັດໃຫ້ການຈັດຕັ້ງປະຕິບັດວຽກງານແຜນການ ແລະ ການລົງທຶນພາຍໃນແຂວງມີປະສິດທິພາບ ແລະປະສິດທິຜົນສູງ.
ຕອນທ້າຍຂອງກອງປະຊຸມ ທ່ານ ວີສອນ ລາວເມົາ ຮອງເຈົ້າແຂວງຜົ້ງສາລີ ໄດ້ຊີ້ນຳໃຫ້ຂະແໜງ ແຜນການ ແລະ ການລົງທຶນທົ່ວແຂວງ ສືບຕໍ່ເອົາໃຈໃສ່ສຶກສາອົບຮົມການເມືອງແນວຄິດໃຫ້ພະນັກງານສະມາຊີກພັກເປັນປົກກະຕິພ້ອມທັງຍົກສູງຄວາມເປັນເຈົ້າການໃນການປະຕິບັດໜ້າທີ່, ສືບຕໍ່ປັບປຸງລະບົບສະຖິຕິ, ຖານຂໍ້ມູນ ໃຫ້ເຂັ້ມງວດມີການວີເຄາະວີໄຈຢ່າງໜັກແໜ້ນ, ສືບຕໍ່ປັບປຸງຂອດການປະສານງານລະຫ່ວາງພາກສ່ວນຕ່າງໆແຕ່ຫົວທີໃຫ້ມີຄວາມລອງລ່ຽງ, ສືບຕໍ່ປັບປຸງສ້າງແຜນໄລຍະໃໝ່ໃຫ້ຫຼາຍຂຶ້ນ ແລະ ມີວີທະຍາສາດ, ປະຕິຮູບການລົງທຶນຂອງລັດ ໃຫ້ມີຫານຫັນປ່ຽນໂດຍສະເພາະການຈັດລຽງບູລິມະສິດໂຄງການອັນຮິບດ່ວນ ອັນຈຳເປັນຂອງແຂວງ, ສືບຕໍ່ເອົາໃຈໃສ່ຫັນການລົງກໍ່ສ້າງຮາກຖານການເມືອງເພື່ອແກ້ໄຂຄວາມທຸກຍາກຂອງພໍ່ແມ່ປະຊາຊົນ, ສືບຕໍ່ປັບປຸງການຈັດຕັ້ງປະຕິບັດພາລະບົດບາດການເປັນເສນາທິການໃນການອະນຸມັດຄຸ້ມຄອງການລົງທຶນພາຍໃນ ແລະ ຕ່າງປະເທດ ໃຫ້ມີການຫັນປ່ຽນຢ່າງເປັນຮູບປະທຳໂດຍສະເພາະການປັບປຸງຂອດຂັ້ນພິຈາລະນາໃຫ້ວ່ອງໄວຂຶ້ນ ເພື່ອບໍ່ໃຫ້ເປັນການກົດໜ່ວງຖວງດືງໃນພັດທະນາ, ສືບຕໍ່ຊຸກຍູ້ຊີ້ນຳ ແລະ ສະຫຼູບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂທາງດ້ານເສດຖະກິດການເງິນໃຫ້ແທດເຖິງກ່ວາເກົ່າ ໂດຍອີງໃສ່ມະຕີ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່.
