ໜ້າຫຼັກ / ການເຄື່ອນໄຫວ / ແຂວງຜົ້ງສາລີສະຫຼຸບວຽກງານ ການເງິນ ປະຈຳປີ 2024 ແລະ ວາງທິດທາງແຜນການປະຈຳປີ 2025
ຕອນເຊົ້າ ຂອງວັນທີ 28 ມັງກອນ 2025 ທີ່ຫ້ອງປະຊຸມຊັ້ນ 5 ຫ້ອງວ່າການແຂວງ,ໄດ້ຈັດກອງປະຊຸມສະຫຼຸບວຽກງານ ການເງິນ ປະຈຳປີ 2024 ແລະ ວາງທິດທາງແຜນການປະຈຳ ປີ 2025 ໂດຍການເປັນປະທານ ຂອງທ່ານ ວິສອນ ລາວເມົາ ຮອງເຈົ້າແຂວງ, ຜູ້ຊີ້ນຳຂົງເຂດເສດຖະກິດ-ຂັ້ນແຂວງ, ມີ ທ່ານ ປອ ວັນໄຊ ສຸກສັນ ຫົວໜ້າພະແນກການເງິນແຂວງ, ມີບັນດາ ຄະນະນໍາພະແນກ- ຄະນະນໍາສາມຂະແໜງການສາຍຕັ້ງ,ມີບັນດາ ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ບັນດາເຈົ້າເມືອງ ແລະ ຫົວໜ້າ-ຮອງຫົວໜ້າ ຫ້ອງການການເງິນເມືອງ 07 ເມືອງ, ຕະຫຼອດຮອດ ພະນັກງານ-ລັດຖະກອນ ຮັບຜິດຊອບວຽການການເງີນ ຂັ້ນແຂວງ-ຂັ້ນເມືອງເຂົ້າຮ່ວມ.
ໃນກອງປະຊຸມທ່ານ ປອ ວັນໄຊ ສຸກສັນ ຫົວໜ້າພະແນກການເງິນແຂວງ, ໄດ້ຜ່ານບົດສະຫຼຸບຕິລາຄາການຈັດຕັ້ງປະຕິບັດແຜນງົບປະມານແຫ່ງລັດ ປະຈຳ ປີ 2024 ແລະ ວາງທິດທາງແຜນການ ປະຈຳ ປີ2025 ເຊີງທ່ານໄດ້ຍົກໃຫ້ເຫັນການຈັດຕັ້ງປະຕິບັດແຜນງົບປະມານແຫ່ງລັດຢູ່ແຂວງຜົ້ງສາລີໃນປີ 2024 ທີ່ຜ່ານມາ.
ໂດຍພາຍ ໃຕ້ການເອົາໃຈໃສ່ຊີ້ນໍາ - ນໍາພາຂອງຄະນະພັກຮາກຖານ, ຄະນະນໍາພະແນກການເງິນລວມສາມສາຍຕັ້ງກໍ່ຄື ການໃກ້ສິດຕິດແທດເອົາໃຈໃສ່ຊີ້ນໍາ, ແນະນໍາຈາກ ກະຊວງການເງິນ ແລະອົງການປົກຄອງແຂວງກໍຄືດ້ວຍ ຄວາມພະຍາຍາມຍົກສູງຄວາມເປັນເຈົ້າການ ແລະຄວາມຮັບຜິດຊອບຂອງພະນັກງານຂະແໜງການເງິນທຸກຂັ້ນ ສົມທົບກັບການສະໜັບສະໜູນຮ່ວມມືຈາກພາກທຸລະກິດ ແລະປະຊາຊົນເຮັດໃຫ້ການຈັດຕັ້ງປະຕິບັດແຜນ ງົບປະມານແຫ່ງລັດໃນປີ 2024 ຜ່ານມາໄດ້ຮັບການຈັດຕັ້ງປະຕິບັດແລະບັນລຸຜົນສຳເລັດໃນຫຼາຍດ້ານ, ອັນພົ້ນເດັ່ນປະຕິບັດໄດ້ 169,722.84 ລ້ານ, ເທົ່າກັບ181.70% ຂອງແຜນການປີ; ການຂຸດຄົ້ນລາຍຮັບເຂົ້າງົບປະມານມາຮອດວັນທີ 31 ທັນວາ 2024 ໄດ້ທັງໝົດ 656,793.86 ລ້ານ, ເທົ່າກັບ 115.91% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 23.23%; ໃນນີ້, ຮັບດຸ່ນດ່ຽງຈາກສູນກາງປະຕິບັດໄດ້ 412,024.69 ລ້ານ, ເທົ່າກັບ 100.00% ຂອງແຜນການປີ, ຖ້າທຽບໃສ່ໄລຍະດຽວ ກັນຂອງປີຜ່ານມາແມ່ນເພີ່ມຂຶ້ນ 17.46%; ລາຍຮັບພູດສູນກາງປະຕິບັດຢູ່ທ້ອງຖິ່ນໄດ້ 75,046.33 ລ້ານ, ເທົ່າກັບ 122,62% ຂອງແຜນການປີ, ຖ້າທຽບໃສ່ໄລຍະດຽວກັນຂອງປີຜ່ານມາແມ່ນເພີ່ມຂຶ້ນ 67,45% ແລະ ລາຍຮັບ ທ້ອງຖິ່ນປະຕິບັດໄດ້ 169,722.84 ລ້ານ, ເທົ່າກັບ 181.70% ຂອງແຜນການປີ, ຖ້າທຽບໃສ່ໄລຍະດຽວກັນຂອງ ປີຜ່ານມາແມ່ນເພີ່ມຂຶ້ນ 48.66%; ດ້ານລາຍຈ່າຍຖືເອົາການເບີກຈ່າຍເງິນເດືອນ, ເງິນອຸດໜູນແລະເງິນນະໂຍບາຍເປັນຕົ້ນຕໍເປັນບູລິມະສິດອັນດັບ ໜຶ່ງໃນການຈັດຕັ້ງປະຕິບັດແຜນງົບປະມານແຫ່ງລັດຮອດວັນທີ 31 ທັນວາ 2024 ສາມາດປະຕິບັດລາຍຈ່າຍໄດ້ທັງໝົດ 501,068.77 ລ້ານກີບ, ເທົ່າກັບ 99.14% ຂອງແຜນການປີ; ໃນນີ້, ລາຍຈ່າຍຂົງເຂດປົກຄອງ 353,748.21 ລ້ານກີບ, ເທົ່າກັບ 99.27% ຂອງແຜນການປີ; ຂົງເຂດສຶກສາທິການແລະກິລາ 112,094.76 ລ້ານກີບ, ເທົ່າກັບ 98.71% ຂອງ ແຜນການປີແລະຂົງເຂດສາທາລະນະສຸກ 35,225.80 ລ້ານກີບ, ເທົ່າກັບ 99.13% ຂອງແຜນການປີ
ຈາກນັ້ນ ປະທານມີຄຳຖາມເຈາະຈີ້ມແລະ ຜູ້ເຂົ້າຮ່ວມປະກອບຄຳຄິດ-ຄຳເຫັນ ຊີ້ແຈ້ງ. ພ້ອມທັງ ເຜີຍແຜ່ບັນດານິຕິກຳ ເພື່ອເປັນບ່ອນອີງໃນການຈັດຕັ້ງປະຕິບັດໃນ ປີ2025.
