ໜ້າຫຼັກ / ການເຄື່ອນໄຫວ / ພິທີປະກາດຕົກລົງສ້າງຕັ້ງພະແນກຕຳຫຼວດນິຕິວິທະຍາ ແລະ ຝຶກອົບຮົມວຽກງານນິຕິວິທະຍາ.
ພິທີດັ່ງກ່າວໄດ້ຈັດຂຶ້ນໃນວັນທີ 27-28 ມັງກອນ 2025 ທີ່ສະໂມສອນກອງບັນຊາການ ປກສ ແຂວງຜົ້ງສາລີ. ເປັນກຽດເຂົ້າຮ່ວມຂອງ ທ່ານ ພັອ ປອ ດວງຈັນ ວົງວີໄຊ ຫົວໜ້າກົມຕໍາຫຼວດນິຕິວິທະຍາ ກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ, ມີ ທ່ານ ພັອ ບຸນລຽນ ແສນວົງ ຮອງຫົວໜ້າກອງບັນຊາການ ປກສ ແຂວງຜົ້ງສາລີ, ມີຄະນະຫ້ອງ, ກອງ, ພ້ອມດ້ວຍນັກວິທະຍາກອນ ແລະ ນັກສຳມະນາກອນເຂົ້າຮ່ວມ.
ໃນພິທີໄດ້ຮັບຟັງຂໍ້ຕົກລົງຂອງກະຊວງປ້ອງກັນຄວາມສະຫງົບ ເລກທີ 1836/ປກສ, ລົງວັນທີ 31 ກໍລະກົດ 2024 ວ່າດ້ວຍການອະນຸມັດສ້າງພະແນກຕຳຫຼວດນິຕິວິທະຍາຂຶ້ນກັບກອງບັນຊາການ ປກສ ແຂວງ ນະຄອນຫຼວງວຽງຈັນ, ເຊິ່ງພາຍໃນພະແນກຕໍາຫຼວດນິຕິວິທະຍາປະກອບດ້ວຍ 3 ໜ່ວຍງານຂຶ້ນກັບຄື: ໜ່ວຍງານບໍລິຫານ-ສັງລວມ ແລະ ຈັດຕັ້ງ, ໜ່ວຍງານຊັນນະສູດສະຖານທີ່ເກີດເຫດ ແລະ ໜ່ວຍງານທະບຽນອາຊະຍາກອນ. ຈາກນັ້ນໃນພິທີຍັງໄດ້ມີການຝຶກອົບຮົມກ່ຽວກັບວຽກງານນິຕິວິທະຍາ, ໂດຍສະເພາະແມ່ນວຽກງານປ້ອງກັນສະຖານທີ່ເກີດເຫດ ແລະ ວຽກງານທະບຽນອາຊະຍາກອນ, ນອກນັ້ນຍັງໄດ້ຝຶກນຳໃຊ້ບັນດາເຄື່ອງມືເກັບຂໍ້ມູນຫຼັກຖານໃນສະຖານທີ່ເກີດເຫດ. ຈຸດປະສົງກໍ່ເພື່ອເຮັດໃຫ້ນາຍ ແລະ ພົນຕໍາຫຼວດທີ່ເຮັດວຽກງານນິຕິວິທະຍາມີຄວາມຮັບຮູ້ເຂົ້າໃຈຕໍ່ກັບວຽກງານວິຊາສະເພາະຂອງຕົນ, ສາມາດນຳໃຊ້ບັນດາເຄື່ອງມືຕ່າງໆເຂົ້າໃນການເກັບເອົາບັັນດາຂໍ້ມູນຫຼັກຖານໃນສະຖານທີ່ເກີດເຫດ, ເພື່ອຊອກຫາ ແລະ ນຳຕົວຜູ້ທີ່ກະທຳຜິດມາດຳເນີນຄະດີຕາມລະບຽບກົດໝາຍ.
