ໜ້າຫຼັກ / ການເຄື່ອນໄຫວ / ເຈົ້າແຂວງໆຜົ້ງສາລີ ເນັ້ນໃຫ້ພະແນກແຜນການ-ການລົງທຶນ ແລະ ພະແນກການເງີນ ຍົກສູງຄວາມຊື່ສັດ, ຈິດໃຈຮັບໃຊ້ຊາດ ແລະ ປະຊາຊົນ
ໃນຕອນເຊົ້າ ຂອງວັນທີ 29 ມັງກອນ 2025 ທີ່ຫ້ອງປະຊຸມຂອງຫ້ອງວ່າການແຂວງ ທ່ານ ຄໍາຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆຜົ້ງສາລີ, ໄດ້ໂອ້ລົມໃຫ້ທິດຊີ້ນຳຕໍ່ 2 ພະແນກການຄື ພະແນກແຜນການ ແລະ ການລົງທືນ ແລະ ພະແນກການເງິນ ແຂວງ, ໃນໂອກາດຈັດກອງປະຊຸມປະຈຳປີ 2024 ແລະ ວາງທິດທາງແຜນການປະຈຳປີ 2025 ເຊິ່ງກ່ອນອື່ນທ່ານໄດ້ກ່າວສະແດງຄວາມຍ້ອງຍໍຊົມເຊີຍຕໍ່ສອງຂະແໜງການທີ່ໄດ້ເອົາໃຈໃສ່ຕັ້ງປະຕິບັດວຽກງານໃນໄລຍະທີ່ຜ່ານມາ ພ້ອມກັນນີ້ທ່ານໄດ້ເນັ້ນໃຫ້ເອົາໃຈໃສ່ຕື່ມຫຼາຍບັນຫາເປັນຕົ້ນແມ່ນ ເອົາໃຈໃສ່ເຊື່ອມຊຶມ, ກໍາແໜ້ນຕໍ່ແນວທາງ, ແຜນນະໂຍບາຍ, ມະຕິ, ຄຳສັ່ງ, ລະບຽບກົດໝາຍ; ກໍາແໜ້ນຄາດໝາຍມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງ,ກໍາແໜ້ນຄາດໝາຍຂອງແຜນພັດທະນາເສດຖະກິດ- ສັງຄົມ 5 ປີຄັ້ງທີ IX (2021-2025) ແລະ ຄາດໝາຍຂອງແຜນການປີ2025 ແລະ ມະຕິຂອງສະພາປະຊາຊົນແຂວງ ໃຫ້ໜັກແໜ້ນເລິກເຊິ່ງ ເພື່ອເປັນບ່ອນອິງ ໃນການຊີ້ນໍາ ແລະ ຈັດຕັ້ງປະຕິບັດວຽກງານ ໃຫ້ຖືກຕ້ອງ,ເອົາໃຈໃສ່ສຶກສາອົບຮົມນໍາພາການເມືອງ-ແນວຄິດ ໃຫ້ຖັນແຖວພະນັກງານ, ສະມາຊິກພັກ, ນັກຮົບ ແລະ ປະຊາຊົນບັນດາເຜົ່າ ມີຄວາມເຊື່ອໝັ້ນຕໍ່ການນໍາພາຂອງຄະນະພັກ ແລະ ການຄຸ້ມຄອງຂອງອົງການປົກຄອງແຕ່ລະຂັ້ນ,ມີຄວາມສາມັກຄີ, ຄວາມເປັນເອກະພາບ ພາຍໃນຄະນະພັກ, ອົງການປົກຄອງຂັ້ນຂອງຕົນ ແລະ ເພີ່ມຄວາມເປັນເຈົ້າ ການ ແລະ ສ້າງຄວາມເຂັ້ມແຂງດ້ວຍຕົນເອງ, ເພິ່ງຕົນເອງ, ຕັ້ງໜ້າສຸມໃສ່ປະຕິບັດມະຕິ 04/ກມສພ ໃຫ້ແຂງແຮງເລິກເຊິ່ງ ໂດຍຫັນເປັນແຜນການ,ໂຄງການໃນຂັ້ນຂອງຕົນຮັບຜິດຊອບສຸມໃສ່ສຶກສາອົບຮົມການເມືອງ-ແນວຄິດ ໃຫ້ພະນັກງານສະມາຊິກພັກ ໃນຂະແໜງແຜນການ, ການເງິນ ໃຫ້ມີຄວາມຈົງຮັກພັກດີ, ມີຄວາມອົດທົນ, ມີຄວາມຊື່ສັດ ແລະ ຍົກສູງຈິດໃຈຮັບໃຊ້ຊາດ,ຮັບໃຊ້ປະຊາຊົນສູ້ຊົນປະຕິບັດຄາດໝາຍຂອງມະຕິ,ຄາດໝາຍຂອງແຜນການປີ 2025 ໃຫ້ປະກົດຜົນເປັນຈິງ ແລະ ປະຕິບັດໄດ້ ລື່ນແຜນການ ເອົາໃຈໃສ່ຕິດຕາມຊຸກຍູ້ ແລະ ປຸກລະດົມແຫຼ່ງທຶນຕ່າງໆ ມາສຸມໃສ່ຈັດຕັ້ງປະຕິບັດຄາດໝາຍຂອງແຜນພັດທະນາເສດຖະກິດ-ສັງຄົມ ປີ 2025 ຕາມທິດ ແລະ ຕາມຫຼັກການ ລັດ ກັບ ປະຊາຊົນເຮັດ, ລັດ ກັບ ປະຊາຊົນ ກັບ ທຸລະກິດ ກັບ ທະນາຄານ ພ້ອມກັນຈັດຕັ້ງປະຕິບັດ ແລະ ໃຫ້ບັນລຸໄດ້ຕາມແຜນ ແລະ ລື່ນແຜນການ ບົນພື້ນຖານ ການສະຫຼູບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ IX (2021-2025) ໃຫ້ເປັນໃຈກາງ,ເປັນເຈົ້າການໃນການສ້າງແຜນພັດທະນາເສດຖະກິດ-ສັງຄົມ 5 ປີຄັ້ງທີ X (2026 - 2030) ໃຫ້ຖືກຕ້ອງຕາມທ່າແຮງ, ຕາມທາງອອກ ທີ່ໄດ້ກໍານົດໄວ້ ໂດຍຫັນເປັນແຜນງານ,ໂຄງການ ໃຫ້ລະອຽດຈະແຈ້ງ ແລະ ສັງລວມດຸ່ນດ່ຽງແຫຼ່ງທຶນຕ່າງໆ ເພື່ອຈັດຕັ້ງປະຕິບັດ ໃຫ້ຊັດເຈນ ຕໍ່ກັບວຽກງານການເງິນ.
ພະນັກງານທີ່ເຮັດວຽກງານການເງິນ ວິຊາພື້ນຖານ ແມ່ນຕ້ອງຮູ້ຊອກເງິນ, ເພື່ອຊອກເງິນເກັ່ງ ຕ້ອງມີວິຊາຄວາມຮູ້ດ້ານເງິນ ແລະ ການບັນຊີເກັ່ງ; ພ້ອມກັນນັ້ນ ກໍ່ຕ້ອງຮູ້ຮອບດ້ານ ມີຄວາມຮູ້ດ້ານທິດສະດີການເມືອງ-ການປົກຄອງ ແລະ ຮູ້ເຮັດວຽກງານສຶກສາອົບຮົມການເມືອງ-ແນວຄິດ ແລະ ຮູ້ຄິດໄລ່ວິຊາສະເພາະດ້ານ ອື່ນໆ ເພື່ອໂຄສະນາເຜີຍແຜ່, ອະທິບາຍໃຫ້ແກ່ ຜູ້ປະກອບການ ແລະ ປະຊາຊົນໄດ້ຮັບຮູ້ເຂົ້າໃຈຢ່າງຖືກຕ້ອງ,ເລິກເຊິ່ງ ແລະ ມີຄວາມຕື່ນຕົວປະຕິບັດພັນທະ, ປະກອບສ່ວນ ໃຫ້ຖືກຕ້ອງ ແລະ ທັນເວລາ ພະນັກງານ ແລະ ທຸກພາກສ່ວນ ຕ້ອງຮັບຮູ້, ເຂົ້າໃຈຢ່າງເລິກເຊິ່ງ ແລະ ຖືສໍາຄັນຍິ່ງຕໍ່ວຽກງານການເງິນກໍ່ຄືແຜນງົບປະມານປະຈໍາປີ, ແຜນການ 5 ປີ; ປະເທດຊາດກໍ່ຄືແຂວງ, ເມືອງ, ບ້ານ ປຽບເໝືອນຮ່າງກາຍຂອງມະນຸດ (ຂອງຄົນ) ຜູ້ໜຶ່ງ ແລະ ໝາກຫົວໃຈແມ່ນການເງິນ, ເມື່ອໝາກຫົວໃຈເຕັ້ນບໍ່ດີບໍ່ປົກກະຕິ, ຮ່າງກາຍຂອງຄົນກໍ່ບໍ່ປົກກະຕິ (ອ່ອນເພຍ), ເມື່ອໝາກຫົວໃຈຢຸດເຕັ້ນ ຄົນກໍ່ຕາຍ ແລະ ຖ້າບໍ່ມີຜູ້ໃດມ້ຽນມັນກໍ່ເໜົ່າເໝັນ, ດັ່ງນັ້ນ ປະເທດຊາດບ້ານເມືອງກໍ່ເຊັ່ນກັນ, ເມື່ອບໍ່ມີແຫຼ່ງທຶນ, ບໍ່ມີງົບປະມານ ມາຮັບໃຊ້ການບໍລິຫານກົງຈັກການຈັດຕັ້ງ, ມາບໍລິຫານວຽກງານ ແລະ ບໍ່ມີເງິນມາລົງທຶນໃນການສ້າງສາພັດທະນາ ຊຶ່ງໃນພາກປະຕິບັດຕົວຈີງຜ່ານມາ ພວກເຮົາກໍ່ເຫັນນໍາກັນຢ່າງຈະແຈ້ງວ່າ:ອົງການຈັດຕັ້ງ ຫຼື ພະແນກການ, ອົງການຈໍານວນໜຶ່ງ ຮູ້ແຕ່ສ້າງແຜນລາຍຈ່າຍ, ແຕ່ບໍ່ຮູ້ຄົ້ນຄ້ວາແຜນລາຍຮັບວ່າຈະເອົາເງິນມາຈາກໃສ, ໃນທາງທີ່ຖືກຕ້ອງແມ່ນຕ້ອງມີແຜນລາຍຮັບກ່ອນ ຈຶ່ງມີແຜນລາຍຈ່າຍ; ຈາກນັ້ນເກີດຫຍັງຂຶ້ນ ເມື່ອສະເໜີງົບປະມານບໍ່ໄດ້ ເກີດມີຄວາມເຂົ້າໃຈຜິດຕໍ່ການນໍາ ຫຼື ຜູ້ບໍລິຫານຂັ້ນນັ້ນວ່າ ຖືເບົາຕໍ່ຂົງເຂດນີ້ຂົງເຂດນັ້ນ,ຕໍ່ວຽກງານນີ້ວຽກງານນັ້ນ, ຊຶ່ງເຮັດໃຫ້ພວກອິດທິກໍາລັງປໍລະປັກ ແລະ ກຸ່ມຄົນບໍ່ຫວັງດີ ສວຍໃຊ້ເປັນຊ່ອງວ່າງໃນການທັບຖົມໂຈມຕີ ຕໍ່ການນໍາພາຂອງຄະນະພັກ ແລະ ການບໍລິຫານຄຸ້ມຄອງ ຂອງອົງການປົກຄອງແຕ່ລະຂັ້ນ;ດັ່ງນັ້ນ ເມື່ອຮັບຮູ້ ແລະ ເຂົ້າໃຈຢ່າງເລິກເຊິ່ງຕໍ່ຄວາມສໍາຄັນຂອງວຽກງານການເງິນແລ້ວ, ພວກເຮົາເປັນຄະນະພັກ, ເປັນການນໍາຢູ່ແຕ່ລະຂັ້ນ ຈະເຮັດແນວໃດ, ຈະເອົາຄົນແນວໃດ, ພະນັກງານແນວໃດ ມາເຮັດວຽກການເງິນ, ການງົບປະມານ, ການບັນຊີ, ມາເຮັດວຽກງານພາສີ, ສວຍສາອາກອນ, ຊັບສິນ ແລະ ອື່ນໆ ຈຶ່ງຈະເຮັດໃຫ້ລະບົບການເງິນມີຄວາມເຂັ້ມແຂງ ແລະ ມີເງິນມາຮັບໃຊ້ບໍລິຫານວຽກງານ ແລະ ມີເງິນມາລົງທຶນສ້າງສາພັດທະນາ, ບັນຫານີ້ ຕ້ອງໄດ້ຕັດສິນໃຈນໍາກັນ
ເອົາໃຈໃສ່ຄົ້ນຄ້ວາຢ່າງເລິກເຊິ່ງ ແລະ ຊອກໃຫ້ເຫັນ ບັນດາແຫຼ່ງລາຍຮັບ ທີ່ເກັບບໍ່ທັນໄດ້ໝົດ, ແຫຼ່ງລາຍທີ່ຍັງຮົ່ວໄຫຼ່, ແຫຼ່ງລາຍຮັບທີ່ຍັງບົ່ມຊ້ອນ ແລະ ແຫຼ່ງລາຍຮັບທີ່ຈະເກີດຂຶ້ນໃໝ່ ແຫຼ່ງລາຍຮັບທີ່ເກັບບໍ່ທັນໄດ້ໝົດແມ່ນ:
ຄ່າເຊົ່າຊັບສິນຕ່າງໆຂອງບຸກຄົນ, ນິຕິບຸກຄົນ ແຫຼ່ງລາຍຮັບຈາກການຫັນປ່ຽນທີ່ດິນ ເປັນຕົ້ນແມ່ນການຫັນປ່ຽນທີ່ດິນ ຢູ່ເທດສະບານແຂວງ, ເທດສະບານເມືອງ ເປັນຕົ້ນ ແມ່ນການຫັນປ່ຽນດິນນາ ມາເປັນດິນປູກສ້າງທີ່ຢູ່ອາໄສ ແລະ ອື່ນໆ; ພ້ອມກັນນັ້ນ ກໍ່ຕ້ອງຖືສໍາຄັນ ແລະ ເອົາໃຈໃສ່ຕໍ່ການສ້າງຖານລາຍຮັບໃໝ່ ໂດຍມີການປະສານສົມທົບກັບພາກສ່ວນກ່ຽວຂ້ອງຕ້ອງຫັນແຜນ¬ການຈັດເກັບລາຍຮັບປະຈຳປີ ມາເປັນແຜນງວດ, ແຜນເດືອນ, ແຜນອາ¬ທິດ ແລະ ແຜນປະຈໍາວັນ ເພື່ອເປັນບ່ອນອີງສູ້ຊົນໃນການຈັດເກັບ ແລະ ສູ້ຊົນເກັບໃນແຕ່ລະວັນ; ຫັນການເກັບລາຍຮັບ ດ້ວຍການນໍາໃຊ້ລະບົບ ແລະ ເຄື່ອງມືທີ່ທັນສະໄໝ ເປັນຕົ້ນຫັນໄປສູ່ການນໍາໃຊ້ລະບົບດີຈີຕອນໃຫ້ກ້ວາງຂວາງເທື່ອລະກ້າວ ຕາມທິດຫັນການບໍລິຫານລັດໄປສູ່ລະບົບດີຈີຕອນ, ສັງຄົມດີຈີຕອນ ແລະ ເສດຖະກິດດີຈີຕອນ ແລະ ແບ່ງຄວາມຮັບຜິດຊອບ ລະຫວ່າງ ຂະແໜງການເງິນຂັ້ນແຂວງ, ຂັ້ນເມືອງ ແລະ ຂັ້ນບ້ານ ໃຫ້ຖືກຕ້ອງແທດຕົວຈິງ; ສໍາຄັນສ້າງການເງິນຂັ້ນບ້ານໃຫ້ມີຄວາມເຂັ້ມແຂງເອົາໃຈໃສ່ເພີ່ມທະວີການປະສານງານ, ການປະສານສົມທົບ ລະຫວ່າງ ພາກສ່ວນຄຸ້ມຄອງເສດຖະກິດມະຫາພາກ ແລະ ເສດຖະກິດຈູນລະພາກໃຫ້ກົມກຽວ ແລະ ເປັນປົກກະຕິ; ການປະສານງານ ລະຫວ່າງ ພາກສ່ວນຈັດເກັບລາຍຮັບ ກັບ ຜູ້ປະກອບການໃຫ້ຖືກຕ້ອງຕາມນະໂຍບາຍ, ລະບຽບກົດໝາຍ ໃຫ້ຖືກຕ້ອງ, ຕີຖອຍປະກົດການສົມຮູ້ຮ່ວມຄິດໃນດ້ານ ແລະ ໃນແງ່ທີ່ບໍ່ຖືກຕ້ອງ ເພີ່ມທະວີວຽກງານກວດກາ,ກວດການ ແລະ ກວດສອບ ໃຫ້ແຂງແຮງ ແລະ ເຂັ້ມງວດ ໂດຍຖືເອົາການຕິດ¬ຕາມກວດກາພາຍໃນເປັນປົກກະຕິ,ຖືກຕ້ອງຕາມສິດ ແລະ ໜ້າທີ່, ສົມທົບກັບການກວດກາພາຍນອກ ຕາມລະບຽບກົດໝາຍ, ທັງນີ້ກໍ່ເພື່ອສົ່ງ¬ເສີມດ້ານຕັ້ງໜ້າ, ສົ່ງເສີມໄດ້ວຽກດີຄົນເດັ່ນ ແລະ ແກ້ໄຂບັນຫາຫຍໍ້ທໍ້
