ໜ້າຫຼັກ / ການເຄື່ອນໄຫວ / 4 ເຜົ່າທີ່ດໍາລົງຊີວິດຢູ່ເມືອງບຸນເໜືອ ສະເຫຼີມສະຫຼອງບຸນກິນຈຽງ ( ໂກນຽນ ).
ໃນຕອນເຊົ້າຂອງວັນທີ 29 ມັງກອນ 2025 ນີ້, ຢູ່ທີ່ເດີນສວນສາທາລະນະເທດສະບານເມືອງບຸນເໜືອໄດ້ຈັດໃຫ້ມີພິທີສະເຫຼີມສະຫຼອງບຸນກິນຈຽງ ( ໂກນຽນ ) ຂອງ 4 ເຜົ່າທີ່ດໍາລົງຊີວິດຢູ່ເມືອງບຸນເໜືອ ຄື: ເຜົ່າຫໍ້, ຮາຍີ, ສີລາ ແລະ ໂລໂລ ຂຶ້ນຢ່າງເປັນທາງການ ໂດຍການຂົ້າຮ່ວມຂອງທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ, ເຈົ້າແຂວງຜົ້ງສາລີ, ມີທ່ານ ວິສອນ ລາວເມົາ ຮອງເຈົ້າແຂວງໆຜົ້ງສາລີ, ມີທ່ານ ສົມພາບ ດາລາຈັກ ເຈົ້າເມືອງໆບຸນເໜືອ, ມີບັນດາທ່ານການນຳຂອງແຂວງ, ຂອງເມືອງ, ຄະນະຮັບຜິດຊອບຈັດງານຂອງແຕ່ລະເຜົ່າ, ຕະຫຼອດຮອດພໍ່ແມ່ປະຊາຊົນຂອງ 4 ເຜົ່າທີ່ດຳລົງຊີວິດຢູ່ເມືອງບຸນເໜືອເຂົ້າຮ່ວມຢ່າງຫຼວງຫຼາຍ.
ໃນພິທີ ທ່ານ ວິສອນ ລາວເມົາ ຮອງເຈົ້າແຂວງໆຜົ້ງສາລີ ຕາງໜ້າໃຫ້ 4 ເຜົ່າ ໄດ້ມີຄໍາເຫັນເລົ່າ ປະຫວັດຂອງ 4 ເຜົ່າວ່າ: ງານສະເຫລີມສະຫລອງຫຼີ້ນບຸນກິນຈຽງແມ່ນເປັນຮີດຄອງປະເພນີ ມູນເຊື້ອອັນດີງາມ ໜຶ່ງທີ່ໄດ້ຮັບການ ສືບທອດກັນມາແຕ່ດົນນານແລ້ວ ກາຍເປັນແນວຄິດ ຈິດໃຈ ຂອງປະຊາຊົນບັນດາເຜົ່າ ໂດຍສະເພາະ ແມ່ນພີ່ນ້ອງເຜົ່າຫໍ້, ເຜົ່າຣາຍີ, ເຜົ່າສີລາ ແລະ ເຜົ່າໂລໂລ ເຊິ່ງມີຮີດຄອງທີ່ຄ້າຍຄືກັນ, ໃນຊ່ວງໄລຍະແຕ່ປີ 1988-1991 ເຜົ່າຫໍ້ 4 ເຜົ່າແມ່ນໄດ້ຍ້າຍມາຢູ່ ບຸນເຫນືອປີ 1988 ຕໍ່ມາປີ 1989 ແມ່ນໄດ້ພາກັນຍົກຍ້າຍຖິ່ນຖານມາປັກຫລັກດຳລົງຊີວິດ ທຳມາຫາກິນເພື່ອລ້ຽງຊີບ ຄອບຄົວ ດ້ວຍຄວາມດຸໝັ່ນ ຊື່ສັດ ອົດທົນ ປະຢັດ ຢູ່ເມືອງບຸນເໜືອ, ຍັງເປັນຊົນເຜົ່າສ່ວນນ້ອຍ ທີ່ນອນຕົວຢູ່ໃນວົງຄະນະຍາດແຫ່ງຊາດລາວ ເປັນຊົນເຜົ່າທີ່ມີອະລິຍະທຳທີ່ເກົ່າແກ່ມາແລ້ວຫຼາຍພັນປີ ມີຮີດຄອງປະເພນີວັດທະນະທໍາ ແລະ ການເຊື່ອຖືທີ່ເປັນເອກະລັກທີ່ຄ້າຍຄຽງກັນ, ສືບທອດ ສາຍສຳພັນດ້ວຍນາມສະກຸນເບື້ອງຜູ້ຊາຍ, ບູຊາບັນພະບູລຸດ, ມີວັດທີ່ເອີ້ນກັນວ່າ (ມ້ຽວຟັງ), ພາກັນຕັ້ງເຮືອນຢູ່ເຂດພູສູງ ແລະ ຕັ້ງເຮືອນຕິດໃກ້ກັບເຂດທຳມາຫາກິນດ້ວຍການປູກພືດກະສິກຳ-ການ ລ້ຽງສັດໃຫຍ່, ນ້ອຍ ແລະ ເຮັດການຄ້າຂາຍ ເຊິ່ງໃນເມື່ອກ່ອນແມ່ນຄ້າຂາຍ ໂດຍອາໄສມ້າຕ່າງສິນຄ້າ ຈາກຕົວເມືອງໄປສູ່ຊົນນະບົດ ແລະ ແລກປ່ຽນສິນຄ້າລະຫວ່າງຕົວເມືອງ. ມາຮອດປັດຈຸບັນກໍ່ມີຫຼາກຫຼາຍອາຊີບເຊັ່ນ: ການບໍລິການໂຮງແຮມ-ບ້ານພັກ, ຮ້ານອາຫານ, ຂົນສົ່ງໂດຍສານ-ສິນຄ້າ, ທຸລະກິດການຄ້າຂາຍທົ່ວໄປ ແລະ ອື່ນໆ, ເຊິ່ງທັງໝົດເຫຼົ່ານີ້ເປັນການ ປະກອບສ່ວນອັນສໍາຄັນເຂົ້ານໃນການພັດທະນາເສດຖະກິດ-ສັງຄົມຂອງແຂວງ ແລະ ເຄື່ອງນຸ່ງຖືຂອງ ເອື້ອຍນ້ອງແມ່ຍິງ ມີຫຼາກຫຼາຍສີສັນທີ່ສວຍງາມ, ອາຫານການກິນ ຕົ້ນຕໍແມ່ນ ມັກກິນເຂົ້າຈ້າວ, ແກງ ຕົ້ມເຄັມ, ຄວາມເຊື່ອຖື, ຮີດຄອງປະເພນີ, ວັດທະນະທໍາ-ສັງຄົມ ຂອງ 4 ເຜົ່າກໍ່ມີລັກສະນະໃກ້ ຄຽງກັນ, ພາສາປາກເວົ້າກໍ່ເຊັ່ນດຽວກັນ, ມາຮອດປີ 2024 ທົ່ວແຂວງ ມີພົນລະເມືອງຂອງ 4 ເຜົ່າ ມີ 8,014 ຄົນ, ຍິງ 3,997 ຄົນ ໃນນີ້: ເຜົ່າຫໍ້ 3,198 ຄົນ, ເຜົ່າສີລາ 2,573 ຄົນ, ເຜົ່າໂລໂລ 1,420 ຄົນ ແລະ ເຜົ່າຮາຍີ 823 ຄົນ; ສໍາລັບບຸນປະເພນີ ກິນຈຽງ ແມ່ນໄດ້ຍຶດຖືສືບທອດກັນມາແຕ່ບັນພະບຸລຸດ ເອີ້ນວ່າ: (ໂກນຽນ) ແມ່ນຈັດຂຶ້ນພາຍຫຼັງສຳເລັດການເກັບກ່ຽວຜົນລະປູກ. ງານບຸນແມ່ນຈະມີກິນຈຽງໃຫຍ່ ຈັດຂຶ້ນ ເມື່ອຮອດມື້ຂຶ້ນ 1 ຄໍ່າ ເດືອນ 1 (ຕາມປີປະຕິທິນຈີນ) ແລະ ກິນຈຽງນ້ອຍ ເມື່ອຮອດ 15 ຄໍ່າ ເດືອນ 1 ຂອງທຸກໆ ປີ ຈຸດປະສົງກໍ່ເພື່ອເປັນການສະເຫຼີມສະຫຼອງຜົນງານໝົດປີຂອງຕົນ ແລະ ເຕົ້າໂຮມຍາດຕິພີ່ນ້ອງ, ເຊິ່ງທຸກໆ ຄົນຕ່າງກໍ່ໃຫ້ຄວາມສໍາຄັນ, ສະນັ້ນ, ການຈັດງານຄັ້ງນີ້ ແມ່ນສຸດທີມີຄວາມໝາຍ ແລະ ຄວາມສໍາຄັນ ທັງເປັນການ ອະນຸລັກ ແລະ ປົກປັກຮັກສາວັດທະນະທຳ, ຮີດຄອງປະເພນີອັນເປັນມູນເຊື້ອອັນດີງາມຂອງ 4 ເຜົ່າ ກໍ່ຄື ຂອງຊາດລາວ ໃຫ້ຢູ່ຈົນເຖີງຮຸ່ນລູກຮຸ່ນຫຼານ, ເປັນການເຕົ້າໂຮມຄວາມສາມັກຄີ ລະຫວ່າງ ພີ່ນ້ອງທັງ 4 ເຜົ່າ ກັບ ບັນດາເຜົ່າໃຫ້ເປັນປຶກແຜນແໜ້ນໜ້າ, ເບິ່ງແຍງ ຊ່ວຍເຫຼືອເຊິ່ງກັນ ແລະ ກັນ, ພ້ອມກັນພັດທະນາ ຊີວິດການເປັນຢູ່ຕາມແນວທາງນະໂຍບາຍຂອງ ພັກ-ລັດໃຫ້ນັບມື້ດີຂຶ້ນ, ເປັນ ການສົມມາຄາລະວະ ພໍ່ແມ່, ຜູ້ອາວຸໂສ ແລະ ເຮັດບຸນເຮັດທານເຖິງບັນພະບຸລຸດທີ່ລ່ວງລັບໄປແລ້ວ, ພ້ອມທັງປັດເປົ່າຄວາມຊົ່ວຮ້າຍໃຫ້ໝົດໄປນໍາປີເກົ່າ.
ໂອກາດນີ້ ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ ໄດ້ມີຄຳເຫັນ ຮຽກຮ້ອງໃຫ້ 4 ເຜົ່າສືບຕໍ່ເພີ່ມທະວີການເຕົ້າໂຮມຄວາມສາມັກຄີ, ຄວາມເປັນປຶກແຜນພາຍໃນເຜົ່າ ແລະ ລະຫວ່າງ ເຜົ່າ ໃຫ້ແໜ້ນແຟ້ນ ແລະ ຮັກຫອມຕອມຕຸ້ມ, ຊ່ວຍເຫຼືອເຊິ່ງກັນ ແລະ ກັນ ພ້ອມກັນພັດທະນາ, ພ້ອມກັນກ້າວໜ້າ. ເອົາໃຈໃສ່ພັດທະນາບ້ານຊ່ອງ, ການຮັກສາຄວາມສະອາດ, ຄວາມຈົບງາມ ແລະ ຄວາມເປັນລະບຽບຮຽບ ຮ້ອຍໃນສັງຄົມ ໃຫ້ດີຂຶ້ນກວ່າເກົ່າ, ເອົາໃຈໃສ່ພັດທະນາຕົນເອງ, ພັດທະນາຄອບຄົວ ແລະ ພັດທະນາທຸລະກິດ ໃຫ້ມີຄວາມຈະເລີນກ້າວໜ້າ ແລະ ປະຕິບັດໜ້າທີ່, ສິດ ແລະ ພັນທະຂອງຕົນ ໃຫ້ຖືກຕ້ອງຕາມລັດຖະທຳມະນູນ ແລະ ລະບຽບກົດໝາຍ. ພ້ອມກັນນີ້ທ່ານໄດ້ ອວຍພອນໃຫ້ຄະນະຮັບຜິດຊອບຈັດງານ ຈົ່ງມີສຸຂະພາບ ເຂັ້ມແຂງ, ມີຜົນສໍາເລັດໃນໜ້າທີ່ການງານ ແລະ ມີຄວາມສຸກ, ຄວາມຈະເລີນ; ອວຍພອນໃຫ້ ພີ່ນ້ອງບັນດາເຜົ່າ ແລະ ບັນດາທ່ານ ທີ່ມາຮ່ວມງານຄັ້ງນີ້ ຈົ່ງມີສຸຂະພາບເຂັ້ມແຂງ, ມີຜົນສຳເລັດໃນໜ້າທີ່ການງານ, ການທຸລະກິດ ແລະ ມີຄວາມສຸກ, ມີຄວາມຈະເລີນ ຕະຫຼອດປີໃໝ່.
ໃນໂອກາດດັ່ງກ່າວນີ້, ໄດ້ມອບຍ້ອງຍໍໃຫ້ກັບພາກສ່ວນຕ່າງໆ ທັງພາກລັດ ແລະ ເອກະຊົນທີ່ມີນໍ້າໃຈອຸປະທຳຊ່ວຍເຫຼື່ອໃນການຈັດງານຄັ້ງນີ້ຕື່ມອີກ.
