ຮັບເອົາມະຫາຊົນກ້າວໜ້າ ເຂົ້າເປັນສະມາຊິກພັກສໍາຮອງ ຂອງໜ່ວຍພັກຫ້ອງວ່າການເມືອງ ຍອດອູ.
23 May 2025 | ຂ່າວ-ພາບ: ໄລພອນ ສີສົມພອນ ຖວທ ເມືອງຍອດອູ. |
ໜ່ວຍພັກຫ້ອງວ່າການເມືອງ ຍອດອູ ໄດ້ຈັດພິທີຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສຳຮອງ
ໃນຕອນບ່າຍຂອງວັນທີ 23 ພືດສະພາ 2025 ນີ້ ຢູ່ທີ່ຫ້ອງປະຊຸມຫ້ອງວ່າການເມືອງ ໂດຍການເປັນປະທານຂອງສະຫາຍ ຈັນທະວີ ປີນຜະຫຍາ ກຳມະການປະຈຳພັກເມືອງ, ເລຂາໜ່ວຍພັກຫ້ອງວ່າການ ມີບັນດາສະຫາຍ ຮອງເລຂາໜ່ວຍພັກ ພ້ອມດ້ວຍສະມາຊິກພັກສົມບູນ ແລະ ສໍາຮອງ ພາຍໃນໜ່ວຍ ເຂົ້າຮ່ວມ.
ໃນພິທີ ໄດ້ຮັບຟັງການຜ່ານມະຕິຕົກລົງ ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສຳຮອງ ຈຳນວນ 1 ສະຫາຍ ຄື: ສະຫາຍ ຄຳແກ້ວ ທຳມະວົງ ຊຶ່ງ ສະຫາຍ ແມ່ນໄດ້ຜ່ານການຮຽນສະໜັບສະໜູນ, ຮຽນກົດລະບຽບ ແລະ ຜ່ານການຝຶກຝົນຫລໍ່ຫລອມ, ຕິດຕາມຈາກຄະນະພັກ ຊຶ່ງຜູ້ກ່ຽວມີຄຸນສົມບັດສິນທຳປະຕິວັດ, ມີຄວາມຫ້າວຫັນຕໍ່ໜ້າທີ່ວຽກງານ, ທັງມີຄວາມຮັບຜິດຊອບສູງໃນການຈັດຕັ້ງປະຕິບັດວຽກງານວິຊາສະເພາະ ແລະ ມີຜົນສຳເລັດຫຼາຍດ້ານທີ່ການຈັດຕັ້ງມອບໝາຍໃຫ້. ຈາກນັ້ນ ສະຫາຍ ຈັນທະວີ ປີນຜະຫຍາ ກຳມະການປະຈຳພັກເມືອງ, ເລຂາໜ່ວຍພັກ ໄດ້ຂຶ້ນມອບມະຕິຕົກລົງ ວ່າດ້ວຍການອະນຸມັດຮັບເອົາມະຫາຊົນຜູ້ກ້າວໜ້າ ເຂົ້າເປັນສະມາຊິກພັກສຳຮອງ ຢ່າງເປັນທາງການ.
ມາໃນຕອນທ້າຍຂອງພິທີ ສະຫາຍ ສະຫາຍ ຈັນທະວີ ປີນຜະຫຍາ ກຳມະການປະຈຳພັກເມືອງເລຂາໜ່ວຍພັກຫ້ອງວ່າການໄດ້ມີຄຳເຫັນຕໍ່ໂອ້ລົມຕໍ່ພິທີ ຊຶ່ງສະຫາຍໄດ້ຮຽກຮ້ອງມາຍັງບັນດາສະມາຊິກພັກພາຍໃນໜ່ວຍ ໂດຍສະເພາະກໍ່ຄືຜູ້ທີ່ເຂົ້າເປັນສະມາຊິກພັກສຳຮອງໃໝ່ໃນຄັ້ງນີ້ ຈົ່ງເອົາໃຈໃສເຊື່ອມຊືມ, ມີສະຕິເຄົາລົບກົດລະບຽບຂອງພັກໃຫ້ຫຼາຍຂຶ້ນ, ເອົາໃຈໃສ່ຝືກຝົນລໍ່ຫຼອມຕົນເອງໃນທຸກດ້ານ ທັງມີຄວາມຮັບຜິດຊອບສູງຕໍ່ໜ້າທີ່ການເມືອງທີ່ຂັ້ນເທິງມອບໝາຍໃຫ້ ໄປພ້ອມກັບການຍົກລະດັບຄວາມຮູ້, ຄວາມສາມາດ, ຄຸນສົມບັດສິນທຳປະຕິວັດ ທັງເປັນແບບຢ່າງທີ່ດີໃຫ້ແກ່ມະຫາຊົນ ແລະ ປັບປຸງກໍ່ສ້າງຕົນເອງໃຫ້ກາຍເປັນສະມາຊິກພັກປອດໃສ, ເຂັ້ມແຂງ, ໜັກແໜ້ນ ໃນຕໍ່ໜ້າ.
Share:
